Baghmara, June 3, 2026: South Garo Hills a·jani Imbloka songo Jal Jeevan Mission (JJM)-ni kamko ka·anio matchotgija tol·e mesokaniko aro tangka jakkalsretaniko nirok sandianiko dakanio rim·a man·aha. Songni manderang, Garo Hills Youth Solidarity (GHYS)-ni dakchakanichi Public Health Engineering (PHE) department-ni official-rang, contractor-rang aro gipin bak donggiparangni kosako Lokayukta Court-o badi ka·doanga baksana tangkarangko cha·minokanina aro songo noko manderangni namgnina chirangko sokate on·na tarigiminko an·tangtangna dake ra·anina am·sandianiko dakchina gita Enforcement Directorate (ED)-ona ra·doangna tik ka·angaha.

Songni manderangni aro GHYS member-rangni u·iatani gitade, Lokayukta-ni Investigating Officer, re·bae nirokaniko dakani somoio chirang jokgijako nikenba, PHE official-rang tol·na mancha name tarisamsoaha ine parakataha. Officer-ni nikanio chi jokenga ine mesokna mangmang Nokmako drae jokkamenggipa chiringonikosa JJM pipe-ona tekenba, sale mesokaha ine uamang u·iataha. Officer-ni re·angpilahaon dikdiksana tekgipa chi pipe-ko Nokmaan okpilaha ine parakataha.

Ia kamara Judicial System-ko kal·stekani aro manderangni kosako namgija dake kal·stape roani ong·a ine GHYS-ni ku·watimgipa Barthazar Momin aganaha. Department an·tangan uamangni daitoko name ka·gija aro tangka cha·gipa contractor-rangko donmitape cha·bokaha. Uamangni namgija kamko mesokna chu·gimik sakkirang chong·motan Nokmani aganani aro video tarigiminrang donga ine parakataha.

Unbaksana, Village Water and Sanitation Committee (VWSC)-ko songni manderang baksa tom·aniko dakgija jrip jrip bikotanina matnangatenba, bill-rang okna aro lekkao project-ni kam matchataha ine mesokna soirangko tol·e ka·dapaniko uamangni chanchichipaniko parakataha.

Iani bidingo Detailed Project Report (DPR), financial bill-rang aro VWSC-ko bikotani attendance sheet-koba on·china dorgastoko galangaha.