Tura, Oct 21, 2026: Ia bilsio 100 Drums Wangala Festival-ni bilsi 50 gapaniko manina tarisoenggipa Chibragre Wangala A·damko da·alo a·dokni Skotong Minister Conrad K.Sangma, baditana kingking kamrang matchotaha uko nina re·baenba, 100 Drums Wangala Festival Committee-ni dilgiparang baksa ia A·chik jatni dal·begipa Wangalaniko maikai chu·sokatna man·gen, chanchirimaniko dakangaha.

Ia biapon 100 Drums Wangala Festival-ni Golden Jubilee-ko manina sienga aro ia chango Dama Bol 1000-ko doke Wangalna gita tarisoenga. Ia bilsi Dama Bol 100-ko doke Wangalaniko bariate, Dama Bol 1000-ko doke Wangalgen. Uni gimin ia program A·chik jatna aro a·dokna namen gamchata. Da·alo ia program-ko chu·sokatna gita Wangala Committee baksa a·dok sorkariba bakko ra·e, kamko ka·enga. Ia dama bol 1000-ko doke wangala Committee-ni proposal-ko sorkari man·soaha. Committee-ni proposal gita gong kror 5.50 budget-ko on·aha aro ia tangkarangko chu·gimik on·na sorkari tik ka·aha ine Skotong Minister aganaha.

Iano pangchake da·alo matchotkugijagipa kamrangko ka·na gita, sorkari PWD department-na gong kror 20-ko on·dapaha ine Sangma parakangaha.

Ia dingtang dingtang, biaprangko tarina PWD department-ni gita kamrangko ka·enga aro kror 5.50-chi ia rika cho·anirangko kam ka·na aro temporary set up-ko ka·na dingtang dingtang korosrang, jekai chrokgipa dolrang dingtang dingtang biaprangoni re·bagen, uarangna re·a doani gari korosrang, cha·a ringani aro dongchakani pilak korosrangna sorkarini gita ia namen gamchatgipa program-ko ong·atna tariaha ine Skotong Minister parakangaha.

Uni gimin da·alo tarisoanirang mai ong·enggen, uko nina gita, anga West Garo Hills-ni Deputy Commissioner aro dingtang dingtang sorkari department-ni official-rang baksa re·bae, neng·nikanirang dongama dongja, Wangala Festival Committee-ni dilgiparang baksa chanchirimna gita ia Wangala A·damona re·baaha ine Sangma aganaha.

“Anga da·alo ia kamrangko nike kusi ong·a aro ia kamrang ta·raken matchotna anga ka·dongenga” ine Skotong Minister aganaha.