Chokpot, June 3, 2026: Chatro saksani Social media-o Chokpot Higher Secondary Skulni bidingo video viral ong·atanina, Chokpot Higher Secondary Skulni Principal talataniko on·ataha.

Principal-ni talatani gitade, Chokpot Higher Secondary Skulko 1968 bilsio kuliaha aro adhoc basis-o ong·genchimoba, batanggimin, bilsi 50 mangna jolni chatro chatrirangna gisiko nangen dangdike on·enga. Chokpot Civil Sub-Division-ni Headquarter ong·e, ia Skulona bang·a chatro chatrirang poraina re·baenga. Ia jolo gipin Higher Secondary Skul dongjani a·sel, dingtang dingtang songrang aro biaprangoni poraina re·bagipa chatro chatrirang bilsianti bang·batroroengoba, pilak chatro chatrirangkon Skulo ra·chaksoenga. Da·o Class XI-o poraienggipa chatro chatrirang sak 250 mang aro Class XII-o 350 mang poraienga.

Secondary gadangni Class IX-o poraienggipa chatro chatrirang sak 150 aro Class X-o sak 80 mang donga. Chatro chatrirangni poraianiko nambatatna aro poraianio gisiko nangbatatna gita, re·anggipa bilsioni Class XII-ko morning shift, dakaha. Chatro chatrirang bang·dugani a·sel, da·o donggipa class room-rang aro asongchakanirang chu·ongjagenchimoba, man·a dipet asongchakanirangko arrange ka·e on·enga, ine Principal parakataha.

“Anga indakeba talatna sika, je viral ong·gipa video-ko niam gri skulni bimingko namgijaona sokataha. Uni video ka·gipa, mikkangchipak bench aro desk-rango asongchakani biap bang bang dongkuengachim, ukode video ka·jaha. Skul nok aro biapna dingtang dingtang neng·nikanirang donggenchimoba, namgipa skie on·aniko dakenga aro chinga skigiparang aro staff-rang bil gnanggipa authority-rangna, skulni nok-jam aro facilities-ko ta·raken namatchina u·iataniko dakronga. Uandaken, chatro chatrirang mikkangchi name aro tom·tome poraiani a·damko man·gen” ineba Chokpot Higher Secondary Skulni Principal Jonil Ch.Marak parakataha.