Gasuapara, June 4, 2026: Batanggipa adita jarangna skang, Garo Hills-o so·sojengjeng ong·ani a·sel, MDC Eleksin-ko dontongatna nangaha. Uni gisepon ja 6-na Eleksin-ko ra·doatani ja·man, a·dokni Governor, gitcham MDC-rangko ja 6 nirokchina EC-ko songe on·aha. Gitcham MDC-rangni Term re·anggipa April 18 tarikon bon·aha. Indiba Governor-ni songe on·ako man·gipa gitcham MDC-rang, Separate Electoral Roll (SER) aro Garo Customary Law (GCL)-ko pass ka·e on·gen, ine A·chik Jatna ku·rachakenba, ja 6-na somoiko ra·aha. Uni gisepon ja 2 batangpiloba, uamangni ku·rachakgimin gita mai ja·kurangko de·ahachim, A·chik Jatna maming talataniko on·kuja, batesa jrip jrip dongenga, ine Rongrikkimgre elakkani Independent candidate Clinton R.Marak parakataha.

Uandake MDC-rangni term matchotani ja·manba, ja 6-na somoiko ra·dape, A·chik Jatna maming namgniko dakdapani dongjaode, ta·rake GHADC eleksin-ko ong·aton nambatgen, aro gital MDC-rang, gitcham MDC-rangni chu·sokgija donanggipa kamrangko chu·sokate on·na man·skagen, ine Marak parakataha.

Garo Customary Law (GCL)-ko tarion sriksrik tarina man·ja, maina A·chik Jatnasa tariani gimin, A·chik Jat sakantian Customary Law-ni drafting copy-ko poraie nina aro u·ie ra·na bil donga. Uni gimin Garo Customary Law-ni copy-rangko Garo Hills-ni kitikbrionan sokatna nanga, Nokma bolantiona aro Mahari Association-rangona copy-rangko watatna nanga. Apsan daken Customary Law-ko tariengon, A·chik a·songni kitik brionan re·e, songantini A·king damprakni niamrangko ma·sie ra·na nangchenggen, maina A·chik Jatni niam bewalrang biaprang aro jolni kri dingtang dingtang ong·a. Ua niamrangko ma·sigija skatang Tura-o asonge niamko segate pass ka·anide A·chik Jatna dal·bea gimaniko ra·bagen, ineba Independent candidate janapataha.

Uni gimin Jatna niamko tarion skanggipa dingtang dingtang committee-rangko aro sub committee-rangko songchengna nanga. Jekai Mahari niam, a·dokni niam, A·king Guriko sima ari ripingani niam, sia bon·anj niam, bia ka·ani niam aro uarang gita, iarang pilakko saksa sakgni mandechi chu·sokatna man·ja. Niamko tarion segoldange, tarie pass ka·aniba ong·taija. Uni gimin A·chik Jatna NIAM tarianiko name taripachina Marak mol·molataha.

Ia niamrangko tarina man·jagenchimode, ta·rake GHADC eleksin-ko ong·atchina Marak didiataha.