Rimrangpara, Oct 23, 2026: West Garo Hills a·jani Rimrangpara Higher Secondary Skulo gital taridapgipa nokko mijal Bristibar salo, a·dokni Skotong Minister Conrad K Sangma, Gambegre-ni MLA Mehtab Chandee A Sangma aro Chokpot-ni MLA Sengchim N Sangma-ni dongpanio, oprake ba nokdonggae on·angaha.

Ua skul nokko nokdonggae on·ani salo a·dokni Skotong Minister, jinmana aganprakangengon, MDA sorkarini miksongani lekka poranian mongsongbatgipa daito ong·ani gimin bilsiantian gong kror 4000 mangko koros ka·enga ine parakangaha.

Batanggipa 2018 bilsio, NPP-ni sorkariko jako ra·e chalaina skang, lekka poranio bang·a dingtang dingtang neng·nikanirang, jekai SSLC porikkao result-rang namgijani, skul nokrang namjae class-rangko ra·na man·gijani aro bang·a dingtang dingtang neng·nikanirangko chagrongna nangachim. Indiba batanggipa bilsi 8-ni gisepo MDA sorkari, rakbee kamrangko ka·anichi da·alo obostarangko nambatatna man·aha ine Skotong Minister aganaha.

Rimrangpara Higher Secondary Skul ru·uta bilsirangna skul nok namsrangjahani a·sel, poraienggipa chatro chatrirang aro skigiparang namen neng·nikanirangko chagrongna nangachim, indiba Chief Minister’s Special Development Fund (CMSDF)-ni ning·o gong lak 14 tangkarangko on·ate ua skul nokko taridapna man·aha ineba Sangma aganangaha.

A·song gimikni Performance Grading Index (PGI)-o Meghalaya a·dokni PGI score-ba 2024 bilsio 448-oni 2026 bilsio 525.71-ona tang·doangaha ine Skotong Minister aganangaha.

Meghalaya a·doko dam 9,000 sorkari LP skulrang gnang, uarangoni dam 3,000 UP skulrang aro dam 1700 Secondary skulrang dongoba, Higher Secondary skulrangde dam 500-san aro college-rang dam 80-san dongaiani gimin chatro chatrirang, poraina biaprangko man·jae, neng·nikanirangko chagrongna nangenga. Uni gimin ua neng·nikaniko chel·atna a·dok sorkari, batanggimin bilsi 8-ni gisepo dam 23 gital college-rangko, Baghmara aro Williamnagar-o gital college building-rangko, Mahendraganj-o gital college-ko, a·dokni skanggipa State University-ko, Shillong-o Engineering College aro dingtang dingtang skie ra·anirangko kulidape on·aha ine Skotong Minister aganaha.

Unbaksana Skigiparangni neng·nikanirangko chel·chakna kamrangko ka·enga, adhoc aro SSA skulrango skigiparangna Structured Pay Framework (SPF)-ko ra·gate, gong kror 800-mangni gita tangka paisarangko skigiparangni dormahana chamaha ineba Sangma aganaha.

Unbaksana, Rimrangpara skulni kal·chakramo gallery-ko rike on·china Gambegre-ni MLA Mehtab Chandee A Sangma, mol·molahani gimin uko gadang gadang dake chu·sokatna Skotong Minister, ku·cachakangaha.Indake tom·anio Gambegre-ni MLA Mehbat Chandee A Sangma-ba jinmana agangengon, Gambegre by-election-na uni campaign ka·miting somoio ua skul nokni bobosta namsrangjahani gimin ua skul nokko rike on·china songni manderang aro skul Managing Committee, uko mol·molaha. Ua, iani bidingo Skotong Minister baksa agangrikon, ua skul nokko rikna gita CMSDF-ni tangka paisarangko on·na ku·rachakaha ine aganaha.

Uandake, Gambegre constituency-ni manderangna dakchakanirangko on·engani gimin, Skotong Minister-ko mittelpilangenba, ua skulko namdapatna skigiparangko nambate skie on·china pilak ma·a paarangko bakrimchina Gambegre-ni MLA mol·molangaha.