Gambegre, Oct 23, 2026 Mijal Bristibar salo a·dokni Skotong Minister Conrad K.Sangma, Gambegre-ni MLA Methab Chandee A.Sangma-ni dongpaanio Gambegre C&RD Block-ni Integrated Block Development Complex (IBDC)-ko nokdonggae on·angaha.

Ua gital Block Office-ko nokdonggae on·ani salo, Gambegre-ni A·king Nokma Chekme Ch Marak, a·dokni Skotong Minister aro Gambegre-ni MLA baksa dongpaaha. Ua gital office nokna jaksrambee a·arangko on·ahani gimin A·king Nokma aro uni ma·drangrangna Skotong Minister, mande ra·pilskaaniko dakangaha.

A·dokni Skotong Minister, Gambegre-ona re·ange, gital rikgipa digital library aro gital kuligipa SBI-ni ATM-koba oprake on·angjolaha.Indake program-ko ong·atanio Skotong Minister, tom·anio dongpae bak ra·giparangna aganprakengon, Meghalaya a·dokni ma·ambio ba itihaso, a·dokni dam 56 C&RD Block-rangon gital, office nokrangko rike aro taridape on·enga ine aganangaha.

Sorkarini bang·bata scheme-rangkon block office-rang gitasa chu·sokate on·engani gimin, block office-rangna namgipa nokrangko nangchongmota aro sorkari, pilak block-rangon office nokrangko gital rike aro taridape on·engaha ineba ua aganaha.

Block office nokrangko, Integrated Block Development Complex ine mingani gimin talatangengon, ia office-o Caste Certificate, EPIC aro pilak nangchongmotgipa lekkarangko tarie on·a baksana manderangna dingtang dingtang kamrango dangdike on·na gita ia office nokko IBDC mingaha ine Skotong Minister aganangaha.