Siju, Oct 22, 2026 A·dokni Skotong Minister Conrad K Sangma, Butbar salo South Garo Hills a·jani Siju C&RD Block-na gital office nokko rikna pangchakaniko songe on·angaha. Ua apsan salon Mandalgitok songo tarigipa Synthetic Football Turf Field-koba oprake on·angjolaha.

Ua program-ko ong·atanio, Siju-Rongara-ni MLA Rakkam A Sangma, Rongjeng-ni MLA Jim M Sangma, Chokpot-ni MLA Sengchim N Sangma, South Garo Hills a·jani Deputy Commissioner Sumit Kumar Singh aro dingtang dingtang department-ni officer-rang, Nokma-Sordarrang, chatro chatrirang, skigiparang, Mondolini dilgiparang aro Siju jolni manderangba bak ra·angtokaha.

Indake ua tom·bimonganio a·dokni Skotong Minister, jinmana aganprakengon, 2018 bilsio NPP-ni dilanichi Meghalaya sorkariko rikchengani somoion ua, a·dokni pilak biaprangon namroro silroroaniko ra·bana ku·rachakaha aro an·tangni ku·rachakgimin, gitan ua da·o a·dokni pilak kona noksikrangonan namroro silroroaniko sokatna kamko ka·enga ine aganangaha.

Mandalgitok songo Synthetic Football Turf-ko kulie on·na man·ahanina ua an·tangni kusi ong·aniko parakangaha aro ua a·dokni pilak constituency-rangon, iandakgipa robol kal·chakani biaprangko sorkari tarie on·enga aro uanan gong kror 300-na baten tangka paisarangko chamaha ine Skotong Minister aganaha.

Batanggimin bilsi 8-ni gisepo a·dokni dam 60 constituency-rangon, stadium-rangko, robol kal·chakram biaprangko, swimming pool-rangko aro indoor stadium-rangko rikna a·dok sorkari, gong kror 2000-na baten tangka paisarangko koros ka·aha ineba ua aganaha.