Shillong, June 9, 2026: Da·o re·baenggipa June 18 tariko ong·na sienggipa, Rajya Sabha eleksin-o Meghalaya Democratic Alliance (MDA-II)-ni candidate ong·e susana gita Skotong Minister Conrad K.Sangma-ni adatang aro a·dokni gitcham Cabinet Minister James Pangsang K. Sangma aro gipin a·gipe dilgiparangni dongpaanio Assembly Secretariat-ni Returning Officer-na nanggipa lekkarangko on·e, June 8 tariko nomination file ka·angaha.

Nomination file ka·na skang Skotong Minister-ni office-o kan·dike bi·aniko dakenba, campaign ka·anina pattianiko ra·angjolaha. James Sangma, nomination file ka·ani ja·man, kobor ra·timgiparangna aganengon, uko seokani ja·man, Rajya Sabha-ni MP ong·e, bang·a dakna nangkuenggipa bangki kamrangko ka·angna aro mikkangchi dakna nangnirangna ja·ku de·anggen ine parakataha.

Ian uni miksonganirang ong·a, jedakode Meghalaya-o nanganirangna ku·rangko on·na ba sokatna man·gen ine Sangma aganaha.