Gasuapara, June 9, 2026:Batangipa April-ni 20 tarik pringni 3 bajimango mikka balwa rake stil ondapanichi South Garo Hills a·jani Gasuapara C&RD Block-ni ning·o donggipa, Mibonpara, Rangmai Aruwak, Tojanang aro Durida songrango nok jamrang nosto ong·e, nokkingni tinrang naprutokaha.

Ia obosta ong·aoni da·o jasa sal 17 mang ong·pilaha, indiba sorkarini maming dakchakaniko man·sokuja aro Block-ni gitaba tin kingsaba on·kuja, ine parakatenba, songni kangal cholgri manderang, tinrangko brepana tangka dongjae, noking selao dongchakna nangenga ine Tojanang songni Aridian M. Sangma parakataha.

Iandake rang·gitik a·sel ba obostarang ong·an somoio manderangna dakchakaniko on·na gita, sorkari district ge·antio District Disaster Management Authority (DDMA)-ko songaha aro una dingtangmancha tangkako chame dona ine wachakenggipa dolni dilgipa Dr. Mukul M.Sangma, re·anggipa antio North aro East Garo Hills-ni adita songrangona re·ange, songni nokni manderangko grongeani somoio parakataha.

Indake ong·genchimoba, South Garo Hills-ni DDMA, duko ga·akenggipa song dambrini manderangna maming dakchakaniko on·kuja ine songni manderang suk ong·gijaniko parakataha.