Shillong, June 10, 2026: Meghalaya Homeguard & Civil Defence department-o kam ka·giparang somoi gita dormaharangko man·jaengani gimin, “Border Wing Battalion, State Disaster Response Force (SDRF)”-o kam ka·giparang namen neng·nikaniko man·enga ine suk ong·gijaniko parakataha.

Border Wing Battalion, Unit-o kam ka·giparangni u·iatani gitade, gipin Unit-rang somoi gita dormaharangko man·genchimoba, Border Wing Battalion Force (SDRF) Unit-de, June-ni 10 tarik ong·piloba, dormaharangko man·kujaengani a·sel, nokdangko chalaianio namen neng·nikaniko man·enga ine suk ong·gijaniko parakatenba, iani bidingo ta·rake nirokatpachina daito gnanggipa officer-rangko mol·molataha.

Indake ong·engon, da·alo apsan department-ni Unit-o kam ka·enggipa Non-Tribal-rangde, dormaharangko man·aha, indiba Khasi, Jaintia aro Garo Tribal-rangde, maini gimin, da·alonaba dormaharangko man·skajaenga ine sing·doatenba, maini gimin mikkang nitee kamrangko ka·enga ine Border Wing Battalion Force Unit-o kam ka·giparang sorkariko sing·doataha.

Border Wing Battalion Force Unit-o kam ka·giparangni seachi parakatani gitade, ia bilsini re·anggipa February aro March jani dormaharangko jagnina kingking ru·utate on·ani a·sel, dingtang dingtang gadango donge department-na dangdike on·enggipa employee-rang nokdangtangtangko chalaianio namen neng·nikaniko chagrongna nangtokenga aro ia June jaoba apsan obostakon chagrongenga ine parakataha.

Iandakgipa obostararangko chagrongna nangenganiara, sorkarini chamaatgipa tangkarang sokbsjaengani a·sel ong·engama, ma department-ni ning·o dangdike on·enggipa Officer-rangni a·selsa ru·utatengams ineba sing·doataha.

Indake, neng·nikanirangko janapatengon, darangkoba matnangna ba galona ong·ja, indiba bil gnanggipa officer-rang iani bidingo ta·rake nirok sandianiko dakpachina didiataha.