Tura, Oct 23, 2026: Garo Hills Independent Candidate Movement Forum (GHICMF), Indian Constitution-ni Article 244 (2)-o on·gimin Sixth Schedule-ara Autonomous District Council-rangni Constitutional Rights ba bil ong·a, ine janapatenba, GHADC election-ko jadokna ra·dodaptaianiko jegale, a·dokni Governor-na lekka sedoataha.

GHICMF-ni Governor-na seatgipa chittio janapatani gitade, re·anggipa March jaon MDC-rangni term bon·aha, indiba Garo Hills-o adita so·sojeng ong·ani a·sel, GHADC election-ko jadokna ra·doataha. Ia jadokna ra·dogipa term mija October 18 tarikon bon·aha aro election-ko ra·dona Garo Hills-o maming emergency a·sel ong·anirang dongjaha, uni gimin election-ko somoi gita ong·atchina GHICMF a·dokni Governor-ko mol·molataha.

Pilak kamrangko matchote ka·china aro GHADC-ko name rakkiangchina gitan, MDC-rangko bilsi 5-na seoke watataha, indiba bilsi 5-ni gisepo MDC-rang bachi gimaaha aro bano tusichipe, bilsi 5-o kamrangko matchotna man·skaja ine GHICMF-ni ku·wattimgipa Clinton R.Marak sing·doataha.

Da·o ong·enggipa EC-rang, SER aro Delimitation-ko pa·sike election-ko jadokna ra·dodalaniara, Democracy-ni bilko aro A·song dongimin niamko namen pe·ani ong·a, ine GHICMF-ni ku·wattimgipa parakataha.

Bebe gita da·o GHADC election-ko jadokna ra·dodapgenchimode, da·o ong·enggipa EC-rang chokkiko wate on·na nanga aro a·dokni Governor-sa District Council-ko jako ra·e chalaina nanga, ong·jaode, ma·mong sorkarini District Council-na on·atenggipa tangka paisarang aro district council-o kajinarangko gile man·enggipa tangka paisarangko nosto ka·e gimaatgen, ineba Marak parakataha.

GHADC-ko Sixth Schedule-ni niamchi bera kadule rakkigimin bil ong·a. District Council-ni MDC-rangna bilsi bonga 5 somoiko on·aha. Bilsi 5-ni ja·man, Executive Committee-ko bon·ate, gital MDC-rangko seoktaina somoi gita election-ko ong·atna nanga. Bilsi 5-ni ja·man, rang·gitik maiba a·selrango pangchake election-ko jadok ra·dona man·a. Indiba jadok somoi bon·ani ja·man, EC-rang district council-ko chalaiangkuna man·jaha, Governor-sa District Council-ko chu·gimik ra·e, election-ko ong·atkujana kingking sason ka·na man·a. Uni gimin, da·o ong·enggipa EC-rang kam watna nanga aro a·dokni Governor-sa District Council-ko jako ra·na nanga, ine GHICMF dabiangaha.