Tura, June 6, 2026: North Eastern Hill University (NEHU), Tura Campus, Sukrobar salo World Environment Day-ko maniangaha.
Ia salko maniengon, skigiparang, kam ka·giparang aro poraienggipa chatro chatrirang apsan ku·monge bakko ra·angaha. Campus-ni ning·o bolrangkosan ge·aigija, campus-o donggipa biaprangkoba rongtal an·talataniko dakangjolaha.

Ia program-ko PGSU, Department of Horticulture aro Department of Forestry-ni dilanichi manianiko dakan baksa mingsa, Eco Club-koba poraienggipa chatro chatrirangna a·bachengate on·angaha. Ia Eco Club-ko Nokrek Guardians Eco Club ine bimingko donaha. Eco Club-ko bikotanichi Campus-ni ning·o dingtang dingtang bol, pul aro uandake nitoatgipa sam bolrangko ge·e nirok simsakaniko dakna ku·mongangaha aro jao changprak mingsasik program-ko ong·ate, Campus-ni namgnina aro dingtang dingtang A·chik A·songni bakrangonaba re·ange Environment-ni namgnina kamko ka·gen ine chanchirimaniko dakaha.

Eco Club-ko bikotanichi dilgipa ong·aniko skie ra·na gita mingsa chol ong·an baksa Campus-ni namgnina jak on·na mingsa chol ong·gen aro dingtang dingtang Environmentalist-rang baksaba golpogrikna cholko bikote on·a gita ong·gen, ine Department of Horticulture-ni HOD Dr. Kalkame Ch Momin jinmana parakangaha.

Iandakgipa Club-rangko bikotanichi NEHU Tura Campus-nasan namgni ong·aijawa, indiba A·chik A·song gimiknan namgni ong·gen, maina NEHU Tura Campus, ge·sa mangmang A·chik A·songo poraiani gadango chubate poraichakram biap ong·a aro iano poraia skia matchote Chatro Chatrirangan songo noko aro songsalo dilgiparang ong·gen, ine PGSU-ni Vice-President Joyshelman D Sangma, an·tangni chanchianiko jinmana parakangaha.