Tura, June 5, 2026: Barengapara Civil Sub-division ning·o donggipa songni manderang salanti walanti bijoli dongjae, namen neng·nikako man·engani gimin, June 4 tariko Kherapara Sub- Station-ni ning·o ga·akgipa songni manderang, MePDCL, Barengapara Sub- Divisional Officer (SDO) aro Sai Computer Ltd-na badi ka·doangaha.

Kherapara Sub-Station-ni ning·o donggipa songrang jekai Amongpara-oni Rimrangpara-ona, Rimrangpara-oni Asugre, Miibonpara-ona Mibonpara-oni Gagagri, Basira aro Josipara songrango bijoli watata salsaba tik on·srangjaenga ine parakatenba, indake jolo songdonggipa manderang namen neng·nikaniko man·enga. Mongsongbate poraienggipa chadamberang, jadokni porikkarang ong·engahani gimin, neng·nikani ong·batenga.

Uasan ong·aigija Office-o kam ka·giparang aro Hospital-rango sanna bananiko on·enggipa doctor aro nurse-rang bijoli dongjani a·sel neng·nikaniko man·tokenga, ine songni manderang parakataha.

Iako badi ka·anio songni manderang baksa Amongpara GDC-ni TMC candidate Sairill D Marak, Amongpara GDC-ni Congress Candidate, Luckshawell M Sangma aro Barengapara GDC-ni TMC candidate Sarbha R Marak mangba chakpaaniko on·ataha.

“Chingni songona bijoli watgiparang salgimik maming sandianiko dakgija, attamo changgni test ka·e nio man·jaode, walgimik bijoli gri donaia. Salgipino salgimik sandipilaniko daktaigija attamosa sandipila dake changgni test ka·o man·jaode, dongpilaia, indakgipa obostarang ong·enga. Indake kam ka·gipa department-ni manderang maming nirok simsakaniko jako ra·na sikjani a·selsa jolo songdonggipa manderang neng·nikaniko man·enga” ine Sairil Marak u·iataha.

Sai Computer Ltd. Office-o kam ka·giparang bill gamna office-chi re·angoba, Hindi aro English ku·sikko agana namgijagipa songni manderangko office-oniko rikgale galenga ineba Marak u·iataha.

Uasan ong·aigija jolni manderang helpline number-ko jakkale, call ka·paoba, office-ni manderang knachakja aro dal·e ra·ja, tanggitik nangana call ka·genchimoba, name response ka·rongja ine Marak matnangataha.

Uandake, bijoli watanirang tik ong·jaoba, Sai Computer Ltd. MePDCL Office-oni nangana bate bill-rangko on·enga ineba parakataha.