Chokpot, June 4, 2026: South Garo Hills a·jani Chokpot jolo bijoli teng·anirang tik ong·srangjani gimin, Chokpot-ni nangrimgimin NGO-rang, June 4 tariko Tura-ni MePDCL Chief Engineer-na chitti sedoangaha.

Da·ororo poraienggipa skul bi·sarang, online class ra·giparang aro Chokpot-ni dingtang dingtang kamrangna bijoliko nangani gimin manderang namen neng·nikaniko chagrongna nangenga. Mongsongbate da·o jadokni porikako sena sienggipa chatro chatrirang namen neng·nikbatenga ine NGO-rang parakataha.

Ia bijoliko skangode, Chokpot-na Tura-ni line-kosa sale on·achim aro unomitingde, bijoli teng·a tik ong·achim, indiba da·o, ia line-ko gimate, Power Station dingtangko Chokpot-ona Mokarapa-oni, Zikzak, PuraKasia, Dalu aro Ronggata-ni ja·mansa Chokpot-ona robegipa silitingrangko salbaskani a·sel neng·nikaniko man·enga, ineba parakataha.

Chokpot-ni line-manrang indita dal·begipa areako sak 5 mangmangsan sal, wal neng·takna man·pilgija line-ko nirokna nangengani gimin, neng·nikaniko man·enga. Uni gimin line-manrangko bang·bate, rakkienba manderangna bijoliko ching·ate on·china, MePDCL-ni Chief Engineer aro uamangni dal·gipa gadango donggipa Officer-rang baksa NGO-rang neng·nikaniko agangrikon, chinga Chokpot-ko skangipa biapo done kamko ka·gen aro Chokpot-na dingtangmancha nanggitikan somoio bijoliko teng·atna gita, Baghmara line da·o ching·atenggipa Ronggata line-koba, Tura Dobasipara-niko watan baksa department raken nirokanggen aro line-manrangkoba chu·onga gita rakkichina Shillong-ni dal·gipa officer-rangna lekka sedoate u·iatgen ine ka·dongataniko aganataha.

Indake namgipa ka·dongatani aro dingtangmancha Chokpot-ko name nirokna gita ku·chakahani gimin Chokpot-ni nangrimgimin NGO-rang kusi ong·e, MePDCL department-na mittelpilskaaniko parakataha.