Shillong, May 13, 2026: Tura town-ko nitobate aro nambate taridapna ra·gatgimin dingtang dingtang Project-rangko nipilna gita mijal Monggolbar salo, a·dokni Skotong Minister Conrad K Sangma tom·aniko ong·atangaha aro ua tom·anio, a·dokni Cabinet Minister Timothy D Shira, Cabinet Minister Sanbor Shullai aro dingtang dingtang official-rang dongpae bak ra·angaha.

Ua tom·anio, Tura town-ni dingtang dingtang biaprangko nambate aro nitobate taridapna ra·gatgipa gong kror 1331-ni Project-rangko nipilangaha aro ua Project-rangara, gong kror 165-ko Tura Integrated Administrative Complex, P.A Sangma Sports Complex, Pa Togan Nengminja Sangma Track & Field Stadium aro Tura Technology Park ong·a.

Iako jako ra·e kam ka·enggipa gipin project-rangara, Tura Bajarko nitodapatani, Convention Centre, Pelga Tourist Circuit & Hospitality Complex, Working Womens’ Hostel, Heliport aro Tura Water Supply Scheme .

Indake, tom·anio, tender on·na tarigimin gong kror 242.74-ni project-rangkoba nipilangaha. Ua Project-rangoni mitamrara, Najing Bajarko taridapani, SMELC-o gari donchakani biap aro Cinema Complex-ko rikani, Tura City Park, Active Ageing Centre, Araimile-o Kids Zone aro Tura Promenade ong·enga.

Sorkarini manchisogimin, gipin kamrangara, Chief Minister’s Youth Center, Circuit House-ko taridapani, Commercial Complex-ko rikani, Street Light-rangko ching·atani, aro Kendriya Vidyalaya-o kal·chakram biaprangko taridapanian ong·enga.

Tura songjinmako nambate taridapna gimik gong kror 1928-mang tangka paisarangko hisapsoaha, ua kamrangko somoi gita matchotatchina aro dingtang dingtang department-rang nangrime kamko ka·china Skotong Minister didiataha.