Tura, May 28, 2026: South Garo Hills a·jao donggipa Sangknigre Pulis Station-ni ning·o ga·akgipa Rongkugre, Sasatgre, Dura A·simgre aro uni wilwilao donggipa songrango salantian, bijoli wata tik ong·srangjani gimin, GHADC eleksino GNC dolni candidate ong·e Amongpara elakkao susana sienggipa, Jakrak A.Sangma, songdongenggipa manderangni palo, West Garo Hills a·jani Deputy Commissioner-na Butbal salo badi ka·doange chitti sedoataha.

Department-oni maming u·iatani gri salantian chang channa ampilgija bijoli sisimsimani a·sel jolni manderang namen neng·nikaniko chagrongna nangtokenga aro bijolini voltage namen komia. Somoi gri load shedding ka·anichi poraienggipa chatro chatrirangna aro dingtang dingtang kamrangko ka·anio namen neng·nikaniko man·tokenga ine Sangma parakataha.

Bijoli ching·a tik ong·jani gimin, songni manderang complaint ka·oba authority-rang name aganchakja ineba parakataha.

Iandakgipa obostarangchi poraienggipa chatro chatrirang, salanti hajira ka·e cha·giparang, game ge·e cha·giparang aro dingtang dingtang kamrangko ka·e janggi tanggiparang dal·bea neng·nikaniko chagrongna nangenga, ine Sangma parakataha.

Ia bijoliko tik ong·e watna man·gijani a·selko namedake sandienba, tik ong·e bijoliko watpachina aro bijoliko off ka·na skang manderangna kobor on·pachina songni manderang mol·molataha.

Uni gimin, manderangni neng·nikaniko namatna gita ta·rake kamrangko ka·e on·pachina Sangma DC-ko mol·molataha.