GHD News, Oct 10: Ri-Bhoi a·jani Byrnihat 15 Mile-o donggipa Rangsakona minggipa songni Nokma John R Marak-ko pulisrang rim·ani ja·man, Bristibar salo Byrnihat Pulis Outpost-o adita so·sojengjeng ong·angaha.

Rangsakona songni saksa Wilbert Marak-ni koborna u·iatani gitade, British-ni chasongonin A·chikrang, Ri Bhoi a·jani Rangsakona songo songdong a·chatokaha, indiba ja·mano Khasi jatni Bhoi manderang ia songona re·bae, A·chikrang baksa songdongepaaha.

Ua somoirango Bhoi Khasirang, A·chikrang baksa meli-nangrimen ia songo songdong a·chatokaha aro uamang A·chik ku·sikkoba namen aganna man·tokaha. Songsul Tamulkuchi aro Borboin songrango jeon Mikir jatrang songdong a·chatokachim, uamangba apsan daken A·chikrang baksa meli nangrime maming kajia-golmal grian da·alona kingking ku·mong nangrime dongtokenga, indiba da·o Bangladesh a·songni sima jolni War jatrang re·baani ja·man, ia jolo songdongenggipa A·chikrang neng·nikanirangko chagrongna nangtokengaha ine Marak aganaha.

“Ia War jatni manderang, A·chikrang baksa meligrikna man·jae, Nongtymai ine bimingko donenba gital songko bikotaha aro uamang Rangsakona songkoba ra·sekna jotton ka·aha indiba Raidmared-ni Raja, jatgnini gisepo kajia-golmal ong·aniko nikna sikjae, uamangni kamko raken jegalaha,” ine Marak aganaha.

Ua manderang, A·chik Nokmarangkoba ra·galna jotton ka·aha aro A·chikrangni kosako sinjetanirangko on·na a·bachengaha.
“Ia manderang, Rangsakona songona re·bae, job card kam ka·giparangko dontongataha, indiba songni dilgiparang, Ri Bhoi a·jani Deputy Commissioner, MLA, MDC aro pulis-rangna lekka sedoenba, chel·chakaniko on·china didiaha” ine Marak aganaha.

“Indake ong·genchimoba, September-ni 19 tariko ia manderang, salo re·baenba, kam ka·giparangko dongtongattaiaha aro ua somoio uamang Raja aro Block-ni manderangko rimbae, kam ka·giparangko champengeaha aro uamangnade Rangsakona songara Nongtymai songsa ong·a ine aganaha. Indiba ja·mano Raja aro Block-ni manderang, lekkarangko nie, iade Rangsakona songni a·an ong·a ine ma·saha. Indioba, ia manderang, October-ni 9 tarikoba Rangsakona songona re·bae kam ka·giparangko champengetaiaha. Uamangni indake changni chang kam ka·giparangko dontongateahani gimin songni manderang, songsul noksulni manderang baksa, AIGU aro GSU dolni dilgiparangba re·bae golpogrikenba iako namate re·angpiltokaha,” ineba ua aganaha.

Uni gisepon, October 9 tarik attamchipak, songsul Nongtymai-ni manderang, Byrnihat pulis outpost-ona re·ange, Rangsakona songni Nokma John R Marak-ko rim·china badi ka·angaha aro ja·mano Nokma-ko rim·ahani gimin, songni nokni aro songsulni manderang jinma Byrnihat pulus outpost-ona re·ange tom·daktokaha. Uandake ja·mano AIGU aro GSU-ni dilgiparang, songni nokni manderang baksa Byrnihat outpost-ona re·ange golpogrikani ja·man Rangsakona songni Nokma John R Marak-ko watpilaha ine Marak parakataha.