GHD News, Oct 8, 2025: South Garo Hills a·jao donggipa, Emangre songni Senggai G. Momin, Romania a·songo ong·atanggipa Chang 51-gipa National Speleological Congress-o Best Educational & Conservation Documentary Film-o 1st Prize ba skanggipa biapko chebaanichi jatna mikkim rasongko ra·baaha.

Re·anggipa September 28 tariko boksis man·gipa jawilwat-ko tarina, Senggai Green Hub Fellowship-ni 8-gipa Batch-o Garo Hills-ni rong·kolrangoniko “Core Geo Expedition” dolrang am·sandianiko dakaha. Indake ua ja·wilwat a·gilsako donggipa a·ningni nitoani, gamchataniko am·sandie iandakgipa a·ningo donggipa ong·telaigipa nitoanirangko skie ma·sie ra·enba, dingtangmancha ripinge donna miksonge ua ja·wilwat-ko tariaha. Uan Core Geo Expedition dolrangni a·ningo donggipa rong·kolrangni nitoaniko ka·sae ripingna gisiko nange tarigipa ong·a.

Ia project-ko Senggai Momin, Manisha Halai, Banyllashisha Wankhar, Sumit Sisodiya aro Amar Maibam apsan nangrime kamko ka·aha. Ia ja·wilwatni gita a·gilsakni ong·telaigipa bakrangko ma·sie ra·na sikani aro samtangtango donggipa sambolrangko ripingna mikrakataniko on·angaha.

Baghmara Campers baksa Senggai Momin, 2021 bilsionin kamrangko ka·e, Garo Hills-ni bang·a bakrangona re·roroe golpo agane on·anirangko dakenga. Senggai Momin-ni chu·sokanian chadamberangna ja·wilwatrangko tarina gisiko nangatna didianiko ra·baani ong·a. Unbaksana samtangtango donggipa ong·telaigipa bakrangni golporang a·gilsak gimikni manderangona ning·tugipa golporangko sokatna man·aniko mesokani ong·a .