New Delhi, May 25: North Eastern Hill University (NEHU)-ni gital Vice Chancellor (VC)-ko songe on·na gita kamrangko a·bbachengatahani gimin, Sombar salo, a·dokni Skotong Minister Conrad K Sangma, Ma·mongni Education Minister Dharmendra Pradhan-ko New Delhi-o gronge mittelpilangaha.

Ma·mongni Union Minister, NEHU-ni gital Vice Chancellor (VC)-ko songna kamrangko a·bachengataniara University-na ka·dongataniko ra·baani ong·aha aro ia kamko ta·raken matchotatna nangenga ine Skotong Minister parakataha.

University-ni namgnina Vice Chancellor-ko songanio ru·ute somoi ra·chajachina, indiba VC-ko seokanio simsake kamko ka·china Sangma, Education Minister-ko mol·molangaha.

Union Education Minister-na sedoatgipa chittio, Skotong Minister-ni parakatani gitade, NEHU-ko chalaianio namen neng·nikanirangko chagrongna nangengani gimin, je mandean, kamrangko ma·sigipa aro dilna changgipa ong·e, University-ko mangrakbate aro nambate chalaina man·gen, uandakgipa mandekosa Vice Chancellor (VC) seokna nangenga.

A·dokni Skotong Minister, NEHU Tura Campus-na Pradhan Mantri Jan Vikas Karyakram (PMJVK)-ni ning·o chamatgipa mingbonga project-rangko chu·sokatna gita dakchakaniko on·china, Union Minister-ko mol·molangaha. Ua Project-rangna Minority Affairs Ministry, gong kror 35 tangkarangko watatmanaha.

“Ia project-rangara, University-nasan ong·aigija, Garo Hills gimikna nangchongmotgipa Project-rang ong·a, maina ian chubata gadangrango lekka poraniko tang·doatanio mongsonggipa ong·enga” ine Sangma parakataha.

Captain Williamson Sangma State University (CWSSU)-ko Greenfield Development Model dake ra·gatengani bidingo Union Minister-na talate on·angengon, iana dingtangmancha tangka paisarangko dakchake on·china gitaba a·dokni Skotong Minister, Union Education Minister-ko mol·molangaha.

Multi-Disciplinary Education & Research Universities (MERU)-ni ning·o CWSSU-na tangka paisarangko dakchake on·china Skotong Minister, Union Education Minister-ko mol·moldapangaha.