Tura, May 26, 2026:: Garo Hills-ni dingtang dingtang songrangko A·chik bimingchi mingjitchina dabie, Garo Hills-ni dingtang dingtang NGO-rang, jekai Niksamso Garo Community Organization (NGCO), A·chik National Youth Organisation (ANYO), aro A·chik Conscious Holistically Integrated Krima (ACHIK), Garo Hills Autonomous District Council (GHADC)-ni Chief Executive Membor (CEM) Dhormonath Ch. Sangma-na chitti sedoangaha.

GHADC-ni CEM-na sedoatgipa chittio NGO-rangni parakatani gitade, Garo Hills-ni Sixth Schedule-ni ning·o donggipa bang·bata songrangkon, jatni daka rikani, jatni ong·baani aro chengoni man·rikanio pangchake bimingrangko mingachim, indiba somoirang re·angroro, mitam songrangkode gipin ku·sikrangchisa mingna a·bachengaha aro sorkarini gitaba gipin ku·sikrangchi minggipa bimingrangkosa jakkalbaaha.

Tura-ni ning·o donggipa Araimile, Dermile aro gipin gittimrangna agreba, Baromile, Phulbari, Rajabala, Selsella, Bhaitbari, Gomaijhora, Mirjumla, Batabari, Balachanda, Bajengdoba, Holdibari, Dainadubi aro uandakgipa songrangko A·chik bimingchi mingjitchina NGO-rang, GHADC-ni CEM-ko didiataha.

Ua biaprangko, Indian Constitution-ni Sixth Scheduled-ni ning·o Tribal-rangko chel·chakna on·gimin niamrango pangchake, A·chik bimingrangchi mingjitna gita ta·raken ja·kuko de·china NGO-rang, GHADC-ni CEM-ko didiataha.

A·chikrangni ku·aganani, daka rikani aro jat ong·aniko mikkangchi tange rakkina gitade, A·chik songrangko ku·siktangchi mingna nangchongmota. Uni gimin, mikkangchi A·chik songrangko jatni daka rikanio pangchake rakkiangna man·na gita pilak songrangkon A·chikkuchi mingjitchina NGO-rang, GHADC-ni CEM-ko didiataha.