Tura, Sep 7, 2026: A·doko Medical poraigiparangko admission ra·na screening test-rangko ra·ani result-rangko ta·raken ba seng·gnang chatro chatrirangna u·iataniko on·china, Garo Hills-ni nangrimgimin
NGO-rang chong·motan Association for Democracy and Empowerment (ADE), A·chik Youth Welfare Organisation (AYWO), Federation for A·chik Freedom (FAF), Federation of Khasi Jaintia and Garo People (FKJGP), Garo Students’ Union (GSU), Education Minister Lakhmen Rymbui-na chitti sedoataha.

Medical-o admission ra·na gita bang·a chatro chatrirangan senge dongengon, mittam chatro chatrirang songadamrango aro chel·gipa biaprango songdonggiparang gnang. Iani a·sel bang·a chatro chatrirangan admission-ko ra·na gita re·bana somoirangko nanga aro tangka paisarangko man·genchimoba, dongchakna aro re·a doanio garirangko man·na neng·nikaniko man·a, uni gimin screening test-rang aro counselling-rangna sal 3 ba sal 5-rangna skangan u·iatchina NGO-rang didiataha.

Medical College-rango poraina screening test-rangna, counseling, admission aro seat-rangko sualani bidingo ta·raken, office-ni somoio parakatna nangchongmota. Senggnang u·iatanichi chatro chatrirang aro ma·gipa pagiparang nangarangko tarisamsona gita man·gen, ineba NGO-rang janapataha.

Uni gimin chatro chatrirangni neng·nikaniko nirokate, man·a kragipa candidate-rangna cholrangko on·e namgipa bewalo admission-ko on·china Education Minister-ko NGO-rang mol·molataha.