Tura, May 25, 2026:: Garo Hills Autonomous District Council (GHADC)-o ‘Consultant’-ni kamna seokako man·gipa mandena, japrako gong lak 2 ka·e dormaha on·na tik ka·aniko Tura-ni MDC aro BJP-ni State Vice President Bernard N Marak raken jegalataha.

Marak-ni parakatani gitade, TNT licence donggijagipa ‘Non-Tribal’ mandeko GHADC-ni ‘Consultant’-na seokaniara kraani ong·ja. TNT licence donggijagipa mandeko GHADC-ni ‘Consultant’-na rakkie, una japrako gong lak 2-ko dormaha on·na tik ka·aha ine adita salrangna skang Executive Committee-ni tom·ao serikaniko nikna man·aha.

Tribal ong·gijagipa mandeko GHADC-ni Consultant dake rakkina Executive Committee-ni tik ka·aniko jegalatenba, “Class X pass ka·gipa mandena GHADC-ni CEM aro Secretary-na bate dormahako on·enga. TNT licence donggijagipa ‘Non-Tribal’ mandeko Consultant-na seoke una japrako gong lak 2 dormahako on·na tik ka·aha ine GHADC-ni serikaoniko nikna man·aha,” ine Tura-ni MDC parakataha.

GHADC-ko chel·chakna bil donggiparang maikai GHADC-ni Executive Committee, songdongkamgipa Tribal-rangko aro ‘Non-Tribal’-rangko chel·chakna dongimin niamrangko pe·aha. “GHADC-o kam ka·giparangni dormahako on·na gitade, District Council-o tangka dongja ine Executive Committee pangnan pa·sikronga, indiba Class X pass ka·gipa aro TNT licence donggijagipa mandenade japrako lak 2 dormahako on·na namnikskaenga”, ine Marak matnangataha.

GHADC-ni ‘Consultant’-na seokako man·gipaara, Sumit Kumar Jain Bohra ong·a aro ua apsan mandekon re·anggipa bilsioba dingtang kamna ‘Consultant’ dake seokahani gimin Tura-ni MDC jegalahachim. Indiba, GHADC-ni Consultant-na songako man·gipa Bohra, Chartered Accountant Degree-ko pass ka·ja aro Tribal Council-na kam ka·na gita nangtelgipa Trading for Non-Tribal (TNT) licence-ba dongja ine Marak parakataha.