Tura, Sep 8, 2026: Garoland State Movement Committee (GSMC) unia A·chik Conscious Integrated Hoslistically Krima (ACHIK) dolgni nangrime, bilsibri mangna galchipe donenga ine koborko man·soani ja·man, A·chik a·songo ge·sa mangmang dongpagipa sorkari Survey Skulko re·ange nieaha.

NGO-rangni u·iatani gitade, ua Survey Skulo Head Master, First Master aro Instructor-rangko ra·dapgija donengani gimin, gital chatro chatrirangkoba ra·dapgija donchipengani a·sel skie ra·enggipa chadamberangna dal·bea gimaani ong·enga.

Ua Skulni Principal-ba giseponsan re·baronga aro uano donggipa Second Master-koba promotion on·chipgija donenga aro nangarangko gisik nange nirokjaenga, Uni gimin, mikkangchi A·chik a·songni namgnina, Garo Hills-o ge·samangmang donggipa, Survey Skulko name rakkiangna man·na gita, ta·raken bangbang dongenggipa biaprango skigiparangko gapchina aro pilak nangarangko chu·sokate on·china, dolgni NGO-rang Meghalaya sorkariko aro Director-rangko didiataha.