Chokpot, May 27, 2026: Re·anggipa bilsirangonin Chokpot jolo bijolini teng·anirang tik ong·jaengani gimin, Chokpot-ni nangrimgimin NGO-rang May 26 tariko South Garo Hills-ni MePDCL, Engineer-na chitti sedoataha.

Da·ororo poraigipa skul bi·sarang, online class ra·giparang aro dingtang dingtang nanga kamrangna bijoli tik ong·jani a·sel, Chokpot jolni manderang namen neng·nikaniko chagrongna nangenga.

NGO-rangni parakatani gitade, skangode bijoliko Chokpot-na Tura line-kosa sale on·achim aro unomiting somoiode, bijoliko tik ong·en man·achim, indiba da·o ia line-ko gimate, Power Station-kon Chokpot-ona Mokarapa-oni, Zikzak, Purakasia, Dalu aro Ronggata gitasa Chokpot-ona robegipa silitingrangko salbaskaengani a·sel neng·nikaniko man·enga aro Chokpot-o line-manrangba chu·ongja, indita dal·gipa areako sak 5 line-mansan sal, wal neng·takna man·pilgija nirokna nangengani a·sel amchakja aro namen neng·nikaniko man·enga ine NGO-rang parakataha.

Uni gimin, chu·onga gita line-manrangko rakkichina aro manderangna tike bijoliko on·china, NGO-rang dabiangaha.

Iandakgipa obostako chagrongengani giminan, re·anggipa 2025 bisilo, Power Minister aro Chokpot-ni MLA-na chittiko sedoatahachim, indiba da·alona kingkingba maming nirokata dongjani gimin, Chokpot jolo bijolina neng·nikaniko ta·rake nirokatpachina South Garo Hills-ni MePDCL Engineer-na chittiko sedoattaiaha, ine GSU Chokpot Regional Unit-ni President Jish A. Sangma u·iataha.