Shillong, Sep 7, 2026:Meghalaya a·dokni University of Science & Technology Meghalaya (USTM)-ni PA Sangma International Medical College (PIMC) Hospital-o ia 2026 bilsini Academic Session-na Admission ra·aniko a·bachengatkujaengani a·sel, ua college-o MBBS-ko poraina seoka man·gipa chatro chatrirang, neng·nikaniko chagrongtokenga ine Meghalaya Pradesh Youth Congress (MPYC) parakatenba, ia 2026 bilsini MBBS-ko poraina ta·raken admission-ko ra·china a·dokni Skotong Minister-ko didiataha.

Iani bidingo a·dokni Skotong Minister Conrad K Sangma-na sedoatenba, University-ni dingtang dingtang neng·nikanirangko sorkarini gita, Health Department namatani ja·mansa gital, chatro chatrirangna admission ra·anirangko a·bachengatna man·gen, ine USTM-ni u·iataniko MPYC-ni President Timjim K Momin jegalatenba, sorkari aro University-ni gisepo meligrikgijani a·sel ia bilsini MBBS-ko poraina seoka man·gipa chatro chatrirang neng·nikanirangko chagrongskana nangenga ine janapatenba, chatro chatrirangna ta·raken admission-ko a·bachengatchina Skotong Minister-ko didiataha.

“University aro sorkarini gisepo meligrikgijani a·sel, maming dos grigipa chatro chatrirangsa neng·nikanirangko chagrongna nangskaenga. Official-rangni u·iatani gitade, fee structure-o pangchakesa chatro chatrirang, college-ni admission aro counseling-rango dongpae, an·tangtangna seat-rangko man·aha. Sorkari aro PIMC ba USTM-ni gisepo tangka paisa aro kamni bidingo meligrikgijanichi chatro chatrirang, an·tangtangna admission ra·anio neng·nikanirangko chagrongna nangani katta dongjachim” ine Momin parakataha.

Indake ong·engon, ia 2026 bilsini State Quota-o seokako man·gipa chatro chatrirangna ta·raken PIMC-o admission-ko on·na gita seachi ku·rachakaniko on·china, 2026 bilsini State Quota-o seokako man·gipa chatro chatrirangna fee ba gamna nanganirangko talate on·china aro sorkari baksa PIMC-ni meligrikgijanio chatro chatrirangna maming nangchakeaniko ra·bajachina MPYC, a·dok sorkariko didiataha.

A·dok sorkari aro PIMC ba USTM-ni gisepo tangka paisa ba kam ka·anirang meligrikgijanichi chatro chatrirangoni darangba bilsisani poraianiko gimaatjachina aro ta·raken admission-ko ra·china, MPYC didiataha.