Chokpot, June 2, 2026: South Garo Hills a·jani Chokpot Higher Secondary Skulo poraienggipa class Xll-ni chatro chatrirang chu·onga gita asongchakani biaprang dongjani a·sel a·pao asongna nangtokengs ine parakataha.

GSU Chokpot Regional Unit-ni President, Jish A. Sangma-ni u·iatani gitade, chatro chatrirang salgimik neng·skime, a·pao asonganiko nike skulni Principal Jonil Ch. Marak-o sing·sandianiko dakon asongchakani bench-rangko tariatengaha, indioba da·o dipet chu·onga gita tariatna man·kuja ine aganchakataha.

Poraienggipa chatro chatrirang class ge·saon sak 280 mang dongani gimin morning shift aro day shift, class-rangko ra·skanaba chu·onga gita skigiparang dongtaija aro sorkarioniko mamingba dakchakaniko man·soa dongkujaenga ine Chokpot Higher Secondary Skulni Principal aganaha.

Chokpot jolo poraienggipa chatro chatrirang college-na brange, skie ra·engani gimin, Chokpot jolo skul aro college-rangko kulidape on·china aro namgipa rika cho·anirangko jolna ra·bachina GSU Chokpot Regional Unit, a·dok sorkariko mol·molataha.