Chokpot, June 1, 2026: Chokpot-ni nangrimgimin NGO-rang Chokpot, Alagre Community Health Centre (CHC)-ko Sonibar salo rang·gitik re·ange nieaha.

NGO-rangni rang·gitik Alagre CHC-ko re·ange nieanio nikna man·ani gitade, doctor saksaba dongja aro sanna bananiko nirok simsakgipa nurse-rang saksaba dongjaha.

Maini gimin doctor aro nurse-rang saksaba hospital-o donggija noktangtangchi re·angtokaha, ine Alagre CHC-ni Incharge Dr. Winje Sangma baksa ku·pilbat gita kobor ra·ate nion, hospital-o
chi man·jani gimin, hospital-o kam ka·giparang gimikan dongna neng·niktokenga ine ua aganchakataha.

“Na·an uamangna jedakeba ringani chi aro auani chiko je cholchiba ra·bae on·na nanggen ine aganaton, na·song NGO-rangan chingna chi ra·bae on·bo” ine Dr. Winje Sangma aganchakataha.

“Chinga uamangni chi donga donggijako ma·sija, Chokpot Alagre jolo songdongenggipa manderangni saa ding·aniko nane sanna bananikosa nangnika. Indiba batesa Alagre CHC-ni Dr Incharge, chingko ra·bia gnang aganchakskaaha” ine GSU Chokpot Regional Unit-ni General Secretary Spensar R.Sangma u·iataha.

An·o donggipa ma·giparangko chi dongjani gimin, Rimrangpara Sub Centre-onasa watatenga ine Dr. Wingje Sangma NGO-rangna aganchakataha.

Unbaksana rang·gitik a·sel ong·giparangko sanna gitaba, Alagre CHC-o Doctor aro Nurse-rang saksaba dongpilgija, bon·pile songtangtangchi re·angtokaha, NGO-rang parakataha.

Walni somoio sagipa manderangko ra·bagenchimode, sawa sanna bananiko dakgen, ine NGO-rang janapatenba, maibakai sanna bananiko man·jae, mandeni janggi gimana nanggenchimode, sawa daitoko ra·gen, ine NGO-rang sing·doataha.

Uni gimin, “Chinga Chokpot-ni nangrimgimin NGO-rang Alagre CHC-ni Incharge Dr Winje Sangma-ni kamko raken jegalatenga aro ua da·alni gisepon ia hospital-ona Doctor aro Nurse-rangko ta·raken sokbaatna nanga” inet NGO-rang dabiataha.

Uni gisepon, “Chingni dabianiko ba mol·molaniko knachakjagenchimode,g chinga Chokpot-ni nangrimgimin NGO-rang mikkangchi, Alagre CHC-ni Incharge Dr Winje Sangma-ni kosako raka ja·kuko de·anggen” ine NGO-rang parakataha.