Tura, May 27, 2026: Re·anggipa salrango NGO-rang aro A·chikrangko rim·a kaani bidingo NGO-rang sorkariko matnangataha.

Re·anggipa March 9 tariko Garo Hills gimikni NGO-rang aro A·chik a·songni manderang gimikan jatsan ong·e, Scheduled Tribe (ST) Certificate-ko Mandatory dakchina dabianio kajia golmal ong·anina, NGO dilgiparangkosan Summon Letter on·e, Statement-ko ra·aha. Indiba Chibinang-o donggipa Jisu-ni Statue-ko dokprigipa, GSU Office-ko wa·al so·giparangkode sorkariara rim·jawama, ine NGO-rang sing·doataha.

Law and Order-ra dos dakgipa manderangnade dingtang niamko tariama? Garo Hills-o A·chik Jatni namgnina ST Certificate-ko dabianiara gualani dongama aro NGO-ni dilgiparangkosan okame sing·sandianiko dakaigenma?

ST Certificate-ko mandatory dakchina dabianio bako ra·gipa apsan jatna chakpagipa MDC-rangba gnang. Uamangba apsan ku·monge, Tura DC Office mikkangon dongpaaha, uamangkode summon on·jawama ine NGO-rang parakatenba, “Chingni sing·anide apsan daken darangkoba mikkang nitegija, da·o ong·enggipa MDC-rangba jegalanio bak ra·paaha. Ua MDC-rangnaba summon on·na nanga. Chinga NGO-ni dilgiparangkosan aro A·chik jatkosan, iandake singjetaniko chingna nangja. Social Media-rango uamangni photo-rangko nikengoba maina sandie summon on·jaenga, Apsan daken uamangni kosakoba niam gita kam ka·na nanga” ine NGO-rang sorkariko dabiataha.

ST Certificate-na dabianio jerangan kajia golmalko ra·bagipa gipin jat sakgnini kosako maina Chargesheet on·gija jamin wataha.

“Chinga uamangni kosako raken jegalatenga. Uamangna Chargesheet on·na nangchongmota, uamangsa kajia golmalko ra·baha. Uamangkode, dikdiksa pattoko donmike, jamin wataniara, A·chik jatko chonnikani kam ong·a. Indakgipa sorkarini kamko chinga ra·chakna man·jawa” ine NGO-rang sorkariko matnangataha.

A·chik a·song gimikon, GHADC eleksin-o gipin jatrang susana ba bak ra·na man·jawa, ine jegalaniko dakengon, manigija, A·chik jatni kosako re·badrae, kajia ong·atgipa Muslim sakgni, SG Esmatur Mominin aro Sofior Rahman-ko Niam gita raken sing·sandianiko dakna nanga, ine dabiangenba, A·chik jat aro a·songni namgnina ku·rang on·dilgipa NGO dilgiparang aro A·chik chadamberangkode, maina da·onaba jamin watkuja, ian A·chik jatko dal·e ra·gijani aro chonnikani kam ong·a, ineba NGO-rang matnangataha.