Bengaluru-o ong·atanggipa, South Asian Symphony Foundation (SASF) Youth Workshop aro Concert 2026-o Northeast ba Salgro Salaram a·dokni palo sakgni chadamberang, Meghalaya a·dokni Ambasal Ch. Momin aro Manipur a·dokni Themsorin Hannah Ningshen bakko ra·angaha.

Ua doka dam·anio Meghalaya aro Manipur a·dokni gisiko nanggipa sakgni chadamberang chu·sokaniko man·anichi jatko niksengataha aro doka dam·ani a·bao gisik nange ja·ku de·aniko mesokaha.
Indake namgipa cholko man·anichi Salgro Salaram ba Northeast a·dokni chadamberangko mikkangchi doka dam·anio changa-sapani aro jatni daka rikanirangko skie ra·na National aro International gadangrangona sokatna didianiba ong·a.

South Asian Symphony Foundation (SASF) Youth Workshop aro Concert 2026-ko Bengaluru-o ong·atanio Northeast India-ni bang·a dokna dam·na changgiparang bakko ra·angtokaha.

Ua concert-o namen chu·sokgipa ong·aha, jekon Beethoven aro Mozart-ni tarigipa Orchestra-ko bon·kame dakmesokangaha.
Venia Cultural Foundation (VCF) aro Venia Academy of Performing Arts and Music-ni gita dingtangmancha Northeast-ni gital chasongo dokna dam·na changgiparangni doka dam·aniko skie ra·ani program-rangko ong·atna, skulrango skie on·ani program-rangko dakna, Ambasal Momin raken kamko ka·enga.

Ua workshop-o gipin a·songrangoni re·bae skigiparang aro dokna dam·na changiparang baksa chanchirimaniko dakna, Ambasal Momin cholko man·aha. Ambasal Momin an·tangan sorkarini kamko wate, doka dam·aniko skie ra·na gisiko nangbataha. Ua bilsi 12 mangonin doka dam·anina namen gisiko nanggipa ong·achim. Ua dingtang dingtang a·songrangchi re·ange bang·a doka dam·anirangko skidape ra·aha aro skigiparang baksa bakrime bang·a didiataniko man·aha. Momin Venia Cultural Foundation (VCF)-niba President ong·e, doka dam·anirangko skie on·enga aro mikkangchi Meghalaya a·dokni dokna dam·na changgiparang baksa doka dam·ani bidingo skie on·ani program, workshop, concert aro cultural exchange-rangko ong·atna miksongenga ineba parakataha.