Imphal, May 13, 2026:: Butbar pringo Manipur a·dokni Kangpokpi a·jao silchidare ra·bitgipa bobil dolrangni chadrapanio, sakgittam Kuki Baptist Mondolini dilgiparang so·otako man·aha aro gipin sakbri Pamongrang, Revrend-rang saknaako man·aha.

Manderangni kobor gitade, so·otako man·gipa aro duko ga·akgipa Mondolini dilgiparangara, Senior Clergy-ni gita delegate watatako man·e, Inter-Association-ni tom·aniona, Churachandpur-oni Kangpokpi-ona re·baengachim, ua somoio silchidare ra·bitgipa bobil dolrang rang·san chadrapsoaha.

Chadrapako man·gipa group-ara, Thadou Baptist Association (TBA)-ni dilgiparang baksa United Baptist Council (UBC)-ni dilgiparang, TBA-ni President Rev. V Sitlhou-ni dilachi Rev. SM Haopu, Rev. Hekai Simte, Rev. Kaigoulun, Rev. Paothang, Pamong Paogou aro gari driver Goumang tom·aniona re·baengachim.

Indake Revrend-rang aro Pamong-rangni kosako ka·saninggija chadrapaniko Kuki Organisation for Human Rights Trust (KOHUR) raken jegalataha aro chadrapanio jak donggipa, NSCN-IM baksa ZUF bobil dolni manderangara “gisik grigipani kam ong·a” ine matnangatenba, iandake tom·tomanina kam ka·giparangko chadrape so·otaniara ‘Goka’-ni kam ong·a ine parakataha.

A·doko bobil dake chakatenggipa Kuki aro Thangkhul Naga manderangni gisepo tom·tomaniko ra·bapilna gitasa Clergy-ni kamko ka·aengachim. Indiba ra·song gribee, bobil dolrangni ka·saninggija chadrapsoanio sakgittam Revrend-rang, Pamong-rang so·otako man·aha aro sakbri Revrend-rang, Pamongrang bilongbee saknaako man·aha.