Tura, April 28, 2026: Re·anggipa February jao West Garo Hills Auto Rickshaw Association-ni kal·atanggipa Lucky Draw Lottery-ko, chegipa mande sakgnina boksisrangko on·na jechakengani gimin,
South Garo Hills a·jani Social Activist Greneth M Sangma, West Garo Hills Auto Rickshaw Association (WGHARA)-ni kosako, West Garo Hills a·jani Superintendent of Pulis (SP)-na badi ka·doangaha.

Lottery man·gipa mande sakgniko, cha·bokna jotton ka·enga ine matnangenba, ua mande sakgnini kosako FIR ka·ani ja·man, WGHARA-ni kosako Greneth Sangma badi ka·doangskaaha.

Ua mande sakgnina boksisrangko on·na jechakengani gimin uamangna compensation ba tangka paisarangko gamskachina Greneth Sangma dabiangaha.

Sangma-ni SP-na badi ka·gipa chittio janapatani gitade, WGHARA-ni ong·atanggipa lottery-o saksa Jashtina Ch Marak minggipa me·chik saksa, 5-gipa boksis (Suzuki Celerio) gariko man·ahachim aro ua an·tangni lekkarangko mesokahaoba, Association-ni dilgiparang, uni bregipa tikitni tong·sa (counterfoil) gimaenga ine una boksisko on·na jechakaha.

“Jashtina Ch Marak, an·tangni boksisko ra·na gita changni chang Tura-o donggipa WGHARA-ni office-ona re·angaha aro lottery-ni Sub-Agent, Asana K Sangma-ba an·tangni Facebook Account-o uko chegipa ine parakahachim. Indiba ua changni chang an·tangni boksisko ra·na Association-ni Office-ona re·angahaoba, una boksisko on·na jechakahani a·sel, ua re·ruraanio tangka paisana neng·nikaniko chagrongna nangaha” ine Greneth parakatenba, uni ia pilak korosrangkon gampilchina Association-o dabiangaha.

“Ua mandeni neng·nikanirangko namatani pal, batesa Association-ni Member-rang, Tura Cherangre-ni Panchi M Sangma aro Karukol Tainang-ni Parbina Ch Marak-kosa Social Media-o Viral ong·ataha ine matnangenba FIR ka·skaaha” ine Greneth parakataha.