Phulbari, Nov 5, 2026: West Garo Hills a·jani Phulbari jolrango, niamgri ita so·ani karkanarangko chalaiengani a·sel samtangtango ong·telaigipa bakrangna aro manderangni an·seng baljokanina nangchakeaniko ra·baenga ine A·chik Dedicated Integrity Leaders (ADIL) Western Zone Phulbari parakataha.

Uni gimin niamgri chalaienggipa ita karkanarangko ta·raken chipatchina, Forest department-ko didiataha. Iani bidingo, ADIL Hollaidanga Range Forest Officer-na sedoatenba, Phulbari jolrango licence gri aro sorkari official-rangni ge·etaniko ra·chenggija ita so·ani karkanarangko chalaiengani gimin, ADIL-ni dilgiparang badi ka·doangaha.

Phulbari jolrango niam gri ita so·ani karkanarangko chalaianichi, namgipa balwarangko moila ong·ate, samtangtango ong·telaigipa bakrangna aro manderangni an·seng baljokanina nangchakeaniko ra·baenga ineba ADIL mikkrakataniko on·atenga ine janapatenba,
nangchongmotgipa licence-rangko ra·chenge, samtangtango ong·telaigipa bakrangna maming nangchakeaniko ra·bajana gita ge·etaniko man·ani ja·mansa, ita so·ani karkanarangko chalaina nanga.

Uni gimin, Phulbari jolrango niamgri chalaienggipa ita so·ani karkanarangko am·sandie, karkana chalaienggipa manderangni licence-rangko nipilchina aro niamgri chalaienggipa ita so·ani karkanaramgko chipatchina ADIL Western Zone, Phulbari, Forest Department-ko didiataha.

Je manderangan niamgri ita so·ani karkanarangko chalaiengachim, ua manderangni kosako rakgipa ja·kurangko de·angchina ADIL Western Zone, Phulbari dabiangaha.