Tura, April 28, 2026: West Garo Hills a·jao April 27 tarikoni May 1 tarikona mikka balwa ta·raknaba donga ine Shillong-o donggipa Indian Meteorological Department (IMD)-oni mikrakataniko man·soahani gimin, manderangni dakna nanggni aro nanggijanirangko West Garo Hills a·jani District Disaster Management Authority (DDMA)-ni Chairman aro Deputy Commissioner u·iataha.

Mikka balwa rakani somoirango dakna nanggni aro nanggijanirangko u·iatenba, nokni gamchatgipa bosturangko naljokgipa biaprango donchina aro radio, torch light battery, mombati, dislai aro chi rongtalatgipa samrangko tarie donchina DDMA u·iataha.

Nok-jamrangko insurance dakchina aro noko jila kaanirang, jekai matchu do·bok aro uandakgiparangko chu·onga gita chi aro jeng donggipa aro naljokgipa biaprangona moange donchina DDMA u·iataha. Balwa ta·rakna siengani bidingo ba balminduri balanirangko kobor ra·na gita pangnan radio knatimchina gitaba DDMA didiataha.Mikrakataniko man·engon, naljoknagipa biaprango chu·onga gita ringani chi, cha·ani aro torangko donchina gitaba, DDMA u·iataha.Balwa ta·rakmiting somoirango man·pakna altugipa bosturang, jekai tin, board aro uandakgipa bosturangko name kae donchina gitaba DDMA mikrakataha.

Balwa ta·rakani somoirango do·ga aro kelkirang nosto ong·atako man·rongani gimin pangnan balwa ta·rakon do·ga aro kelkirangko chipe donchina gitaba DDMA u·iataha. Balmindurirang balon, songo noko jinmani tik ka·gimin biaprangona re·ange dongchina gitaba DDMA u·iataha.Mikka balwa rakmiting somoirango skatang a·palchi ong·katjachina DDMA mikrakataniko on·ataha.Samrangko ringengon, oko mamingba cha·ani ringani gri ringjachina aro expire ba somoi batgimin samrangko ringjachina gitaba DDMA mikrakataha.

Samrangko ringna skang pangnan an·seng baljokaniko on·na kam ka·enggipa manderango sing·chengchina gitaba DDMA u·iataha.Tol·gipa kobor-rangko name talchenggija gipatjachina aro an·tangtangba bebera·jachina DDMA-ni Chairman aro Deputy Commissioner, mikrakataniko on·ataha.