Resubelpara, Nov 4, 2026: North Garo Hills, a·jani Chidadet songo rikenggipa palang ge 100 chakgipa Resubelpara Civil Hospital-ni a·arangko niam gri a·kanganiko den·galpilchina Rongrong-ni MDC Rinaldo K. Sangma GHADC-ni CEM Dhormonath Ch. Sangma-na sedoataha.

Iani bidingo kakketko ma·sina gita am·sandie nion, North Garo Hills a·jao donggipa Chidadet songo, Resubelpara Civil Hospital-ko rikenggipa, bigha 300-ni ning·o man·gipa a·arangko palna, Chidadet Gambalgong A·king Nokmani No Objection Certificate (NOC) on·aniko ma·sina man·aha, ine Sangma parakataha.

Ua a·arangko, sanna bannanirangko on·na rika cho·aniko namdapatna aro hospital-ko apbalbatatna gita, 2015 bilsio Nokma aro songni manderang kusi ong·bee sorkarina indin on·aha, ine Sangma parakataha.
Da·o Resubelpara Hospital-na, Maternity Ward Hospital-ko aro nursing skulko rikna a·arang chu·ongjaengaha ine Sangma janapataha.

Uni gimin, ong·gija dake a·kangenggipa pilak a·a pattarangko aro Resubelpara Civil Hospital-ni bigha 300-ni ning·o man·gipa a·arangko palna Chidadet Gambalgong A·king Nokmani NOC on·aniko den·galpilchina, Rongrong-ni MDC, CEM-ko mol·molataha.

Unikoa, ua a·arangni bidingo mikkangchiba maming songgigrikaniko dakjachina gita, A·king Nokmako raken champengatchina Sangma, CEM-ko didiataha.