Resubelpara, April 28, 2026: North Garo Hills a·jao rim·gittanga man·gipa mande saksako pulisrang, re·anggipa April 25 tarik Sonibar attamchibara jokatna man·aha.

North Garo Hills Superintendent of Pulis (SP)-ni koborna u·iatani gitade, bading chiwalgipa mande saksako ma·sina man·gijagipa manderang, Bolsong joloniko Ertiga gario rim·gittange ra·angaha ine Sukrobar attamni 3 bajimango, Bajengdoba Pulis Station-o koborko man·soaha. Koborko man·soani bakan pulisrang, Mansinggre-o check point-o dongenba, re·ruraenggipa garirangko nisona a·bachengaha.

Indake, Pulisrangni nisoengmitting somoio, Sonibar attamni 3 bajimango, janapatgipa gariko rim·sona man·aha aro ua garioniko am·sandie nion, rim·gittanga man·gipa mandeko gario nike, uko pulisrang jokataha.

Ua a·selni bidingo pulisrang sandiroke nion, dos dakgipa manderang, ua mandeko, Bolsong-Agia ramao rim·soenba, uni motorcycle chabiko ra·seke, uni tangka aro mobile phone-ko ra·e kataha ine ma·sina man·aha.

Ua manderangko pulisrang dos dakgiparang ine ma·sina man·aha aro ia a·selni bidingo ainni gita ja·kurangko de·na a·bachengataha ine SP parakataha.

Dos dakgipa manderangko sing·sandion, matnanga man·gipa manderangoni saksa an·tangtangko United Garo Peoples’ Forum (UGPF) minggipa dolni membor-rang ine aganaha ine SP parakataha.

Ia a·selni bidingo, Bajengdoba Pulis Station-o mokordomako segate, ning·tue sandirokaniko dakna a·bachengataha.