Tura,, April 15, 2026: GHADC-ni Deputy CEM aro Taxation Department-ko jako ra·e nirokenggipa Stevie M.Marak aro Taxation Department-ni Official-rang, Tura bajaro dokkan dakenggipa aro bading chiwalgipa gipin jatrang, District Council-ni Professional Tax aro TNT Licence-rang dongama, dongja aro gital dake taritaiama, tarija sing·sandianiko dakaha.

Uamangni bang·a dokkanrang aro bank-rangona re·ange sandianiko dakon, bang·bata, dokkanrango kam ka·giparang, dokkan nokgiparang professional tax tarigija dokkanrangko dakenga aro uamango TNT Licence-rangba dongja ine nikna gita man·aha aro mitamrang rprofessional tax aro TNT licence-rangko renew ba gital dakgija jakkalenga ine nikaha.

Uandake district council-na je gamna nangenggipa professional tax aro TNT Licence-rangko gital dakgija ba renew ka·chipgija jakkalengani a·sel, District Council-ni man·gnirang namen komienga aro GHADC-ko chalaianio tangka paisana namen neng·nikaniko chagrongna nangenga, ine GHADC-ni Deputy CEM, Stevie M.Marak kobor ra·timgiparangna aganaha.

Uni gimin, jemangan TNT Licence gri aro Professional Tax tarigija ba renew ka·gija dokkanrangko chalaiengachim, sal 15-ni gisepon district council-na gamna nanggiparangko gamja ong·ode, uamangni professional tax aro TNT licence-rangko den·galgen ine Marak parakataha.

Uni gimin pilakan somoi gita district Council-na gampachina aro professional tax tarina nanggiparangko tarichina ba renew ka·na nanggiparangko renew ka·china gitaba Marak didiangaha.

Ia professional tax aro TNT licence-rangko Tura-osan ong·aigija, Garo Hills-o dokkan dakenggipa aro bading chiwalenggipa gimikkon check ka·gen aro Teer Counter-rangkobs check ka·gen, ine parakatenba, gipin jatrang gimikan professional tax aro TNT Licence dongna nanggen, professional tax aro TNT Licence gri, ia Sixth Schedule-ni ning·o bading chiwalna aro dokkan dakna man·jawa, ine Marak parakataha.

Unbaksana A·chik bading chiwalgiparangba Professional Tax-kode tarie bading chiwalpachina Deputy CEM didiataha.