Tura, April 15, 2026: Garo Hills Autonomous District Council (GHADC)-ko 1952 bilsio man·chengaoni 2026 bilsiona bilsi 74 gapaniko April 14 tarik Monggolbar salo Tura District Auditorium-o nambee maniangaha.Ia GHADC-ni bilsi 74 gapaniko maniaona a·dokni Tourism Minister Timothy D Shira, mongsonggipa sokgipa ong·e, bak ra·angaha aro unbaksana West Garo Hills a·jani Deputy Commissioner Vibhor Aggarwal, GHADC-ni Chief Executive Member (CEM) Dhormonath Ch Sangma, Deputy CEM Stevie M Marak, GHADC-ni Chairman Sengchim N Sangma, ABDK-ni General Secretary, Rev. Dilseng Sangma, MDC-rang aro GHADC-ni official-rang aro staff-rang pilakan bak ra·angtokaha.

Ia tom·anio, a·dokni Tourism Minister Timothy D Shira, jinmana aganprakangengon, British sorkarini India a·songko sason ka·aoni jakgitel ong·na, India a·songni manderang ru·utbea bilsirangna dakgrikani ja·man, 1947 bilsio India a·song jakgitelko man·aha. Indake, India a·songni jakgitelko man·ani ja·man, a·bri jolrango songdonggipa Tribal jatrang, dal·dalgipa jatrangni ning·o janggi tangna namen neng·nikaniko man·gen, uamang namen dingtanggipa a·brini jatrang ong·a aro uamangni daka rikani bewalrang, cha·a ringanirang namen dingtanga. Uamangko dal·dalgipa jatrang onchepgen aro sinjetaniko on·gen. Uni gimin a·brini jatrang dingtang niamrangko tarie, jattangchi sason ka·na man·na gita, Autonomous District Council (ADC)-ko on·china dabiskaaha ine aganangaha.

Ia dabianiko India sorkari knachake, Sixth Schedule-ni ning·o an·tangtangni a·a-chiko, A·king Gore-ko, jatni dakbewal rikbewalrang aro niam-retirangko tarie, an·tangtangchin sason ka·e, an·tangtangni a·dok chigako aro gam-jinrangko name ripingchina, 1952 bilsio Garo Hills Autonomous District Council (GHADC)-ko on·aha aro da·alona kingking jatni dakbewal rikbewal, niam-retirangko name ripingbaenga ine Shira aganangaha.

Ia tom·anio GHADC-ni CEM Dhormonath Ch Sangma-ba jinmana aganprakengon, 1952 bilsio Indian Constitution-o pangchake Garo Hills Autonomous District Council (GHADC)-ko man·aha, ua somoio Captain Williamson A. Sangma GHADC-ni skanggipa CEM ong·e, pilak niamrangko taridile donangaha. Ua A·chik a·songni kajinarangko gile jatni namgnina dangdike on·angaha. Uandaken, da·alona manderangni nangnikanirangko chu·sokatna man·enga. Ru·uta bilsirangna A·chik jatni nangnike dongenggipa, niam jekon GHADC eleksino gipin jatrang susana ba bak ra·na man·jawa ingipa niam, ST Certificate-ko a·dokni Skotong Minister Conrad K.Sangma-ni dakchakanichi chu·sokatna man·aha aro District Council-o kam ka·enggiparangna ja 43-ni dormaharangko on·na man·gija dongenggipako, ja 12-ni dormaharangko changsano on·na man·ahani gimin, kam ka·giparangni neng·nikanirangko namatna man·aha ine Sangma aganaha.

A·chik a·songo songdongenggipa manderangni nangnikenggipa GHADC-na dingtang electoral roll, Garo Customary Law (GCL) aro Service Rule-ko ra·gate on·na gita gital Executive Committee (EC) kamko ka·enga. Ia kamrangko chu·sokatna kam ka·anirango MDC-rang, Official-rang, Staff-rang aro A·chik a·songni manderang pilakan apsan ku·monge bakrimpachina GHADC-ni CEM didiangaha.

Da·alo GHADC-ni bilsi 74 gapaniko manianio, dingtang dingtang skulrang, dokgipa dam·giparang, git ring·salgiparang jekai St Xavier’s Secondary Skul, Tura Public Skul, Montfort Skul, Tura Music Academy, Do·kaku Art & Cultural Association aro Da Suraka dolrang, gitrangko ring·e, chrok mesae dakmesokangipa pilakkon, Sangma mittelpilskaaniko on·angaha.