GHD News, Tura, Oct 22, 2025: Rongram Outpost-ni Pulisrang, ACHIK Organisation-ni bimingo badinggipa manderangoniko tangka gildrae ra·ani gimin Butbar salo sakgittam manderangko rim·aha.

Rim·a man·gipa sakgittam manderangara South Garo Hills a·jani Lower Durabanda-oni Mansrang Ch. Marak, Donstand A. Sangma aro John Momin ong·achim. Uandake uamangni jakkalgipa Maruti car ML-07-B-3936 garikoba Pulisrang rim·aha.

Ua manderang dingtang dingtang tangka dabie ra·ani kamrango jak dongama dongja, pulisrang am·sandianiko dakenga ineba parakataha.