Tura, Oct 24, 2026: Meghalaya a·dokni Education Department, SPARK Meghalaya Skul Programs in Articulation, Resilience & Kindness State Summit, 2026-ko Sukrobar salo Tura District Auditorium-o ong·atangaha. Ia program-o a·dokni Skotong Minister Conrad K Sangma, mongsonggipa sokgipa ong·e bak ra·angaha.

Ia program-ko ong·atanio, District Administration aro Education Department-ni Official-rang, jury member-rang, dingtang dingtang skulni Principal-rang, skigiparang, chatro chatrirang aro dingtang dingtang a·jani chadamberang bak ra·angtokaha.

Iandake ia program-o a·dokni Skotong Minister, jinmana aganprakengon, chadamberang baksa ia program-o bak ra·na man·ahani gimin, ua kusi ong·aniko parakangaha. Ia apsan SPARK State Summit-ko re·anggipa bilsiode Shillong-o ong·ataha, indiba ia bilsiode, a·doko donggipa chadamberang dingtang dingtang jatrangni daka rikani, doka dam·ani, cha·ani ringani bewalrangko ma·sie ra·na man·na gita Tura-o ong·atskachina, Sangma, SPARK dolko didiataha.

Bang·a chatro chatrirang ia program-o bak ra·na gita, Tura-ona re·batokahani gimin, Skotong Minister an·tangni kusi ong·aniko parakatengon, a·dokni chadamberang, dingtang dingtang biaprango donggipa jatrangni gimin ma·sie ra·china miksonganio da·alo State Summit, 2026-ko Tura-o ong·ataha ine Sangma aganaha.

Ia SPARK Summit-ara chadamberangna, an·tangtangni changa sapanirangko aro ma·sianiko mesokna namgipa chol ong·a. Chadamberango ka·dongani aro namgipa mande ong·na sikaniko ong·atanian, ia program-ni miksongani ong·a ine Skotong Minister aganaha.

Chadamberangan a·dokni dal·batsranggipa krongrang ong·a aro ia cholko ra·e a·dok sorkari, namgipa bewalo cholrangko bikotna nangchongmota ineba ua aganaha.

A·dok sorkarini chadamberangna ra·gate on·gipa program-rang, jedake Meghalaya Grassroot Music Program (MGMP)-ni ning·o sak 8000 chadamberang, an·tangtangni dakna namnikgipa kamrangko a·bachengate, tangka paisarangko kamaina man·enga aro dingtang dingtang biaprango an·tangtangni changa sapanirangko mesokna gitaba cholko man·enga ine Skotong Minister aganaha.

Ia SPARK State Summit-ko ong·atna man·ahani gimin, Education Department-ko mittelpilangon, Meghalaya a·dokni bang·a program-rangkon da·alo daksningengaha aro iandakgipa program-rango tangka paisarangko koros ka·aniara indin koros ka·mangmangasan ong·aija, indiba mikkangchi re·baenggipa chasongrangna koros ka·samsoaniba ong·enga ine Skotong Minister aganaha.

Ia program-ko ong·atanio, SPARK Outcomes Report 2026-ko Skotong Minister oprake on·angjolaha aro District SPARK Star-rangna mande ra·pilskanikoba dakangjolaha.