Shillong, April 29, 2026: Re·anggipa 2025 bilsini May jao an·tangni segipa Raja Raghuvanshi-ko so·otanio mongsongbate jak donga ine matnangako man·gipa, Sonam Raghuvanshi-ni jaminna bi·aniko changgittamna jechakani ja·mano, Shillong-ni District aro Sessions Court, ia bilsini April 28 tariko una jaminko (bail) on·aha.

Re·anggipa 2025 bilsini May jao uamang jiksesa bia ka·daldale, Meghalaya a·dokona dikdiksa kusi ong·e roramna, chong·motan honeymoon-na re·baani somoio ua obosta ong·aha. Uamang jiksesa East Khasi a·jani Sohra jolo gimaani ja·mano, Raja Raghuvanshi-ni sigimin manggisiko June 2 tariko chubegipa a·kuangoniko man·aha.

Sonam segipako so·ote, songtangchina katangpilenba, srik srik nok para ra·e dongengmitting somoio pulisrangni sandiako kobor man·e, ua an·tangko Uttar Pradesh pulisna bame on·eaha aro uni mikchagipa Raj Kushwaha baksa gipin sak 6 manderangko Raja Raghuvanshi-ko so·otanina rim·aha.

Indiba dosi dakgipa sak 5 manderang jamin (bail) man·ahaoba, Raj Kushwaha-kode, jamin on·gija pattoko donkuenga, ine kobor man·aha.

Kacharini Sonam-na jaminko on·ani bidingo Sonam-ni pagipa baksa kobor ra·timgiparang aganna jotton ka·ahaoba, ua iani bidingo mamingkoba aganna jechakaha.