Shillong, April 28, 2026: Re·anggipa March jao Garo Hills-o so·sojengjeng ong·ahani gimin, Garo Hills Autonomous District Council (GHADC)-ni eleksin-ko jadokna ra·doataha. Uni gisepon, GHADC eleksin-ni bidingo jeko chanchina skangba a·dok sorkari, District Council-ni songe on·gipa Delimitation Committee-ni Report-na sengkuenga ine Monggolbar salo, a·dokni Deputy Skotong Minister aro District Council Affairs (DCA)-ni Minister Prestone Tynsong parakataha.

Tynsong-ni parakatani gitade, Delimitation Committee-ni Report-ko on·ani ja·mansa, Council-o pass ka·e uko Governor-na watatgen.

Delimitation-ni Report-ko Council-o pass ka·ani ja·man, Governor-ni ra·chakahaosa, GHADC eleksin-ko ong·atani giminde sorkari chanchigen, ine DCA-ni Minister parakataha.

Delimitation Committee-ni kamko ka·na dongimin somoini bidingo sing·on, Delimitation Committee-na jagittam somoiko on·ahani gimin, committee somoi gitan kamrangko matchote report-ko on·gen ineba Tynsong aganaha.

GHADC-ni Constituency-rangko sima saltaina gitan, Delimitation Committee-ko songaha. Uamangasa area aro voter-rangni bang·a, bang·gijako nigrike, badia constituency-oniko badiachipak chapatna nanga aro bachipakko aktongna nanga kamrangko ka·anggen, ine Tynsong kobor ra·timgiparangna aganaha.