Dadenggre, April 29, 2026: West Garo Hills a·jani Dadenggre jolo current ba bijoliko watani pangnan tik ong·simjaengani gimin, Dadenggre Progressive Students’ Association (DPSA)-ni dilgiparang suk ong·gijaniko parakatenba, daito gnanggipa department maming u·iatani gri salo aro walo chang 15 chang 20 mang, maini a·sel bijoli sianga sokbaa dakenga ine sing·doataha.

DPSA-ni parakatani gitade, Dadenggre jolo salantian komigija chang 15 mang baten bijoli sisimenga aro bijoli dongoba, basakobade voltage-rang chu·ongjaenga ine jolo songdongenggipa manderang uamangna badi ka·tokatani gimin, iandakgipa obosta ong·engania, changsasan ong·ja, indiba batanggimin somoirangonin apsan dakgipa obostarangko chagrongna nangenga ine parakatenba, ia neng·nikenganiko ta·raken niroke namatchina, DPSA-ni Vice President Chesrang Ch Marak daito gnanggipa department-ko mol·molataha.

Bijolirang tik ong·gijanichi, ia chasongo kam ka·giparangna namen neng·nikani ong·enga, jedake poraienggipa bi·sarang, Semester porika segiparnag poraianio, pale sim·e cha·giparang, Office-o kam ka·giparang, online kam ka·giparang, sanna bananina, naljokanirangna aro mongsongbate walni somoirango bijoli dongjani somoio cha·ugiparangna kenchakani ong·enga ine Marak parakataha.

Indake ong·engon, ia neng·nikanirangko namatchina daito gnanggipa department-o chu·onga gita kam ka·giparang dongjani a·selma? ma kam ka·giparang changjae ba kamtangko name ka·jani a·selsa ong·engama ine sing·doate, kam ka·giparang chu·ongjagenchimode, manderangko rakidapchina didiate, mikkangchi iandakgipa obostarangko chagrongna nanggenchimode, jolni Nokma-Sordalrang, NGO-rang aro manderang tom·aniko ong·ate, rakgipa ja·kurangko de·anggen ine mikkrakataniko on·ataha.