Baghmara, Oct 28, 2026: South Garo Hills-ni nangrimgimin NGO-rang jekai FKJGP, ADE, AYWO, AHAM, NGCO, ADIL APA National Highway (NH)-62 (217) ramako tarichipgija galchipe donengani gimin aro district administration ia ramani bidingo maming ja·ku de·aniko dakgija, knaona knagija dake dongengani gimin, da·al October 28 tarikni wal 7 bajioni pring 5 bajiona sima ari dongija Indefinite walo rama champenganiko dakgen ine parakatenba, South Garo Hills a·jani Deputy Commissioner-na seachi u·iataha.

Ia NH-62 (217) ramako tarie on·china dabie, re·anggipa September-ni 2, 3 aro 24, 25 tarikrango Non Cooperation Movement (NCM)-ko ong·atahachim, indiba a·dok sorkari, district administration aro NHIDCL maming aganchakaniko on·jahani gimin, re·anggipa October-ni 14 tarikoba jinma jegale re·jomaniko dakangaha. Indiba NHIDCL aro PWD NH Division, Baghmara maming aganchakaniko on·kujaengani gimin, chinga da·alo rama champengataniko a·bachengatna ga·akaha, ine NGO-rang parakataha.

NH-62 (217) rama namjabatroroengani gimin, South Garo Hills-o songdonggipa manderang salanti re·a doanio, dingtang dingtang nanga kamrangna songre songbatanio, bading chiwalanirango namen neng·nikaniko man·tokenga. Rama namjani a·selan garirang nosto ong·enga, ramao a·sel ong·e manderangni janggi gimaaniko naljokatna gita, NH-62 (217) ramako ta·raken tarie on·china dabie, batanggipa salrango changni chang lekkarangko see mol·molaniko dakahachim, indiba da·alonan a·dok sorkari, district administration, NHIDCL aro PWD HN Division, Baghmara chingni dabianiko knachakja ine NGO-rang parakataha.

Chinga tom·tome tom·tome rama champenganiko dakengon, nangchongmotgipa kamrangnade re·na man·aigen, jedake sagipa manderangko hospital-rangchi salgipa ambulance gari aro fire truckrangkode champengjawa, ineba NGO-rang parakataha.