Ampati, Oct 27, 2026: Civil Society A·chik Welfare Organization (CSAWO), HQ Ampati, Sombar salo Mahendraganj Jawahalal Navodaya Vidyalya (JNV) Skulo poraienggipa class VIII-ni me·chik bi·sa saksako ong·gija dake sasti on·a baksa chonnike aro kal·steke roani bidingo, JNV Skulni Principal Abdul Ghani aro skulo niroktimgipa Sujatha Yadav-ni kosako jegale, South West Garo Hills a·jani Deputy Commissioner aro JNV-ni Chairman-na badi ka·doangenba lekka sedoataha.

JNV Skulo poraienggipa class VIII-ni me·chik bi·sa Denosabiamchi D. Shira, re·anggipa August 13 tariko saani gimin, nokona re·baha. Uni ja·mano saa namkalahani gimin, me·chik bi·sani ma·gipa pagipa August 26 tariko medical report baksa uko skulona rimangpilahachim. Indiba House Madam Sujatha Yadav, ua me·chik bi·sako skul napna on·jaha. Indake October 17 tarikoba JNV Skulni Principal Abdul Ghani, me·chik bi·sani ma·a paako okamate, ua me·chik bi·sako rimbapilna on·jaha. Unikoa October 24 tariko Principal, ua me·chik bi·sani TC-ko okna application on·ako goe galenba, TC on·na jechakaha aro na·song jechiba re·ange badi ka·bo, maming dakna man·jawa ine aganataha.

Indake bi·sani mikkangchi poraigniko champengani ba skul napna on·gijaniara, Right to Education Act, 2009 aro JNV-ni guideline-ko pe·ani ong·a ine CSAWO parakataha.

Iani bidingo ta·rake sandianiko dakenba, JNV Principal aro House Madam-ni kosako raka ja·kuko de·china. Me·chik bi·sani poraianio mamingba champengani gri ta·rake admission-ko ka·pilchina. Ma·a paa nangnika ong·ode, me·chik bi·sana TC-ko on·china, CSAWO dabiangaha.

Uni gisepon, ia dabianiko knachakjaode aro kakket bichalko on·jaode, democracy-ni bewalo niam gita, jingjengataniko dakanggen ine CSAWO parakataha.