Baghmara, August 2, 2026: Rongara jolo bijoli wata tik ong·jani gimin, Rongara-ni dingtang dingtang NGO-rang jekai GSU Regional Unit, FKJGP Rongara Circle, APA, GHYS aro GSU Moheskola Regional Unit, Sukrobar salo South Garo Hills a·jani Deputy Commissioner (DC)-ko gronge lekka sedoangaha.

Rongara Sub Station-o chu·onga gita kam ka·giparang dongjani a·sel, bijoli wata tik ong·jaenga aro name nirokna man·jaenga ine janapatenba, jolni manderang namen neng·nikaniko man·enga ine parakataha.

Ru·uta somoirangonin bijoli wata ba ching·a tik ong·srangjani a·sel songdonggipa nokantion, skichakram biaprango, hospital-o sanna bananirang, bading chiwalanirang, office-o kam ka·giparang, namen neng·nikanirangko chagrongna nangenga.

Uni gimin chu·onga gita kam ka·giparang aro technical staff-rangko Rongara Sub Station-o rakkichina NGO-rang didiangaha.

Rongara jolo songdongenggipa manderangni namgnina ta·raken nirokataniko dakenba, tik ong·gijagipa bijoli watanirangko namdapatchina, chu·onga gita linemen-rangko aro technical staff-rangko Rongara Sub Station-o rakkidapchina aro nanggitikan somoirango ta·rake jakkalna man·na gita bijoliko tarisamsoe donchina gitaba NGO-rang didiangaha.

Iasan ong·aigija, Rongara C&RD Block-ni ning·o donggipa Rongara, Mahadeo aro Moheskola jolrango Jio Network namsrangjani giminba, NGO-rang DC-ko gronge badi ka·doangaha.

Jio Network namjani a·selan office-o kam ka·giparang namede kamrangko ka·na man·jaenga, salantio kam ka·e cha·giparang, online gita poraigiparang, tangka paisa gamna nanganirang aro tangka paisa okanirang, bading chiwalgiparang aro jolni manderang internet data ka·sinani gimin, bang·a champengataniko man·tokenga ineba NGO-rang parakataha.

Uni gimin, iani bidingo ta·raken sandiataniko dakchina, jio service provider-na ge·etaniko on·china aro namgipa jio service-ko on·china, NGO-rang DC-ko mol·molangaha.