Shillong, Nov 2, 2026: GHADC election-na tarisoengon, sakgittam Trinamool Congress (TMC)-ni member-rang aro GHADC-ni MDC-rang, November 4 tariko NPP dolo napangna siengaha ine kobor man·aha.

Re·baenggipa GHADC election-o NPP dolko bilakdapatna aro district council-o bilko man·taina, Garo Hills-ni TMC member-rang doltangko wate NPP dolo napangskana cholko ra·engaha.

NPP dolo napangna sienggipa sakgittam TMC, MDC-rangara Kharkutta GHADC elekkani MDC Cherak W. Momin, Williamnagar-ni MDC Alphonsus R.Marak aro Balachanda-ni MDC Agassi Marak ong·a.

Koborni gitade, sakgittam MDC-rangsan ong·aigija, gipin TMC MDC-rangba, NPP-o napangkugen, ine ka·dongsoaniko parakataha.

Ian political dilgiparangni a·baku ong·a, bang·a political dolni dilgiparangan an·tangtangni bilko jakkalna aro man·gnina mikpakma nie, doltangko watanga aro badia dolo namgniko man·gen uko sandia. Iandakgipa bewalrang political dolni dilgiparang sakantion dongkama. Uni gimin je political dolba baikamgipa aro pangkamgipa ong·na gita man·rongja.