Tura, August 2, 2026:Garo Hills-ni Nokma Sani Union (NSU) adita salrangna skang bilsini tom·bimonganiko Tura District Auditorium-o ong·ate chanchirimanio, Garo Hills-ni pilak Nokma A·kingrango kam ka·na re·bagipa rorirangko Nokmani see-jote on·a gri nok-jamrangko rikna man·jawa, ine tik ka·angaha. Uni gisepon saoba Nokmani see on·gipa lekkarangko aro No Objection Certificate (NOC)-ko ra·gija bangal rorirangko rimbae nok-jamrangko rikatgenchimode, gong hajal 10,000-ko A·kingna dai gamna nanggen ine parakataha.

Unbaksana kam ka·gipa rorirangko sakgittamna bate rimbana man·jawa. Uandake Sorkarini dingtang dingtang project-rangko rika cho·anirangko dakenggipa contractor-rang aro company-rang Nokmani A·kingo skatang bangal rorirangko rimbae kamrangko ka·atna man·jawa. Contractor-rang rika cho·ani kamrangko ka·na gita rimbana man·gen, indiba Nokmani NOC-ko ra chengna nanggen, ineba parakataha.

Je A·king ba songrango kam ka·na Labour Licence-ko tariengon, A·king damgipinna tarigipa Labour Licence-ko jakkalna man·jawa. Uni gimin je A·kingo kam ka·na re·baenga, A·king antinio donggipa Nokmani NOC-ko ra·chengesa Labour Office-o dorgastoko gale, Nokma A·kingrangona kam ka·hiparangko rimbana man·gen. Saoba manigija drae rorirangko kam ka·atgenchimode, gong hajal 10,000-ko gamna nanggen. Indiba dai gamjagenchimode, Nokma Sani Union (NSU)-ni dongimin niamo pangchake Legally Court-o badi ka·doanggen ine parakataha.