@ghdnews.in@

Tura, Nov 2, 2025: West Garo Hills a·jani Selsella Pulis Outpost-ni ning·o donggipa Selsella, Mandagre songni bilsi 23 ong·gipa A·chik me·chik saksa, an·tangko rim·sruke ra·angenba, drae bia ka·aha aro kragija til·ekdraan baksa ka·mikkenate roani ja·mano Muslim toromko drae ra·atahani gimin, Rajabala-ni gipin jat me·asa saksani kosako badi (FIR) ka·doangaha.

Duko ga·akgipa Balsera Ch Marak-ni Selsella Pulis Outpost-o badi ka·doangani gitade, re·anggipa 2024 bilsini December 19 tariko, ua an·tangni mobile phone nosto ong·ako tariatna Rajabala bajarona re·angani somoio, me·asa saksa, Rofiqul Islam-ko grongchengaha, uni ja·mano ua me·asa, una phone ka·atjringe, uko ka·mikkenatna a·bachengaha.

Ua me·asani phone ka·ako ra·chakja ong·ode, uni ma·a paa aro nokdangni manderang gimikkon so·ote galgen ine ka·mikkenatahani gimin, ua me·asani phone ka·atarangko ra·chakna draatako man·aha, ine badi ka·anio janapaha.

Uandaken, re·anggipa January 1 tariko, uko Mandagre ramao grongna aganatahani gimin, ua me·chik ramaona re·angon, Rofiqul Islam an·tangni ripengskarang baksa gari gipoko re·bae, uko Rajabala-ona drare rimangaha aro uko drae til·ekaha, ineba Balsera Ch Marak, badi ka·gipao parakaha.

Uni ja·man, January-ni 6 tariko ua me·asa uko Assam a·dokni Mankachar-ona rimange, Kristian toromoni Muslim toromko ra·draataha aro uni bimingko Balsera Ch Marak-ni palo Taniya Begum ine seskaaha, ineba ua FIR-o janapaha. Muslim toromko ra·draate biming mingjitani ja·man, ua me·asa uko, Assam-ni Hat-Singgimari Court-o bia ka·draaha aro bia ka·na jechakahani gimin, uko ka·saninggija dake jakkalaha, chu ringe cha·e pekani ja·mano doke sate roaha ine Balsera, pulisna badi ka·gipao janapaha.

Indake antisamangna rim·drange donani ja·man, uko Rajabala-ona rimbapilaha, indiba uko a·palchi ong·katna on·jaha aro uni ma·a paa baksa golpona on·gija kal·ake rokaha, ineba badi ka·gipao ua me·chik parakaha.

Uandake, August jao, Rajabala-o mande saksako jinma doke siatanio ua me·asaba jak dongpaani pulisna kate dongmitting somoio, me·chik ua biaponi joke katna man·aha aro Tura Women Pulis Station-o badi ka·eaha. Indiba ua me·asa, uni pulis-na badi ka·aniko ra·galpilchina uko ka·mikkenataha ine me·chik, badi ka·gipao janapaha.

Indake, ia bilsini October jao ua me·asa, “angni jonggipako Rajabala bajaro chu pekate, rim·e donaha aro anga re·angpilja dipet, angni jonggipako watatpiljawa ine jechakani gimin, angni jonggipako jokatna anga re·angpilaha” ine Balsera Marak parakaha.

Uni ja·man, re·anggipa October 22 tariko me·chik bon·kame ua me·asaoni joke katbana man·piltaiaha aro ua changode, uni ka·mikkenatanina bame on·jawaha ine Balsera Marak, badi ka·gipa chittio parakaha.