GHD News, Tura, Oct 19,2025: South Garo Hills a·jani Chokpot Civil Sub-Division-ni ning·o donggipa Paromgre songo koela bikotengani a·sel samtangtango ong·telaigipa bakrangna nangchakeaniko ra·baenga ine Chokpot jolni nangrimgimin NGO-rang jekai Garo Students’ Union (GSU), A·chik Holistic Awakening Movement (AHAM), Chokpot Area Vigilance Committee (CAVC), Garo State Movement Committee (GSMC), A·chik Conscious Holistic Integrated Krima (ACHIK), aro Federation of Khasi Jaintia and Garo People (FKJGP) aro A·chik Youth Welfare Organisation (AYWO) parakatenba, Paromgre songo koela bikotaniko champengatchina a·dok sorkariko didiataha.

NGO dilgiparang baksa BDO, Pulis official-rang aro chel·chakgipa dolrang, Sonibar salo Paromgre songona re·angenba, koela bikotenggipa biaprangko nieaha aro koela bikotenggipa biapara, Chokpot jolrango songdongenggipa manderangni jakkalenggipa chiring chibisikrang, jekai Rompa bisik, Rongdik, Khakiza aro Rongma chiringrangni sambaon ong·ani gimin, ua chiring chibisikrangna nangchakeaniko ra·baenga ine nikna gita man·aha.

Ua chiring chibisikrangara, Chokpot jolrango songdongenggipa manderangni ringna aro dingtang dingtang kamrangna jakkalenggipa chiring chibisikrang ong·achim. Ua jolrango koela bikotaniko dontongatja ong·ode, samba jolrango jokenggipa chiring chibisikrang tipchanggnok aro ua chiring chibisikrango pangchake janggi tangenggipa manderangna aro matburingrangnaba kenchakani ong·enga ine Chokpot jolni NGO-rang parakataha.

NGO-rangni parakatani gitade, ua jolrangara Nokrek a·brini sepango ong·ani gimin ua jolrango nikronggijagipa sam-bolrang aro matburingrangkoba nikna man·enga, indiba ua jolrango skatang koelarangko bikotengani a·sel iandakgipa sam-bolrangna aro matburingrangna kenchakaniko ra·baenga.

Uarangsan ong·aigija Chokpot jolrango nitogipa aro rona rotogipa biaprang jekai, Abong Chigat, Redingsi, Wari Chora aro Tengte Rongrep biaprang dongani gimin dingtang dingtang biaprangoni manderang, ua biaprangko nina aro rona re·batokenga. Uni gimin ua jolo koela bikotaniko dontongja ong·ode, bakan ua nitogipa biaprang gimachongmotgen aro ua jolrango songdongenggipa manderangna janggi tangani cholrangba gimagnok ine NGO-rang parakataha.

Garo Hills-ni badiaba biaprango niam gri rong·mesak bikotenga ine matnanganirang ong·katani ja·man, ia jolrangoba koelarangko bikotmika dake rong·mesakrangko bikotnaba donga ine NGO-rang parakataha.

Ua jolrango koela bikotaniko champengna gita ta·raken ja·kurangko de·china, Chokpot jolni dingtang dingtang NGO-rang, Meghalaya sorkari, Forest department, aro Pollution Control Board-ko didiataha.