GHDNEWS

ghdnews.in

Chokpot, Oct 29, 2025: South Garo Hills a·jani Chokpot Civil Sub Division-ni ning·o donggipa Paromgre songo koela aro rong·mesak bikotenga ine chanchichipani bidingo, South Garo Hills a·jani District Administration-ni agangipa kattarang kakket ong·ja ine Chokpot jolni nangrimgimin dingtang dingtang NGO-rang, chong·motan Garo Students’ Union (GSU), A·chik Holistic Awakening Movement (AHAM), Garo Land State Movement Committee (GSMC), A·chik Youth Welfare Organisation (AYWO), Chokpot Area Vigilance Committee (CAVC) aro Federation of Khasi Jaintia and Garo People (FKJGP) dolrang raken jegalataha.

NGO-rangni parakatani gitade, Paromgre songo koela aro rong·mesak bikotengani bidingo Chokpot-ni nangrimgimin NGO-rang aro songni manderangni badi ka·anirangko da·odipet man·soa dongkuja ine District Administration-ni Highland Post aro Ku’rongdik songbad-rango see parakataniara kakket ong·ja, maina October 18 tarikon nangrimgimin NGO-rang, Paromgre songona re·ange, koela aro rong·mesak bikotgipa biapko nikani ja·mano, bakan District Administration-na badi ka·e lekka sedoataha.

“District Administration-ni Chokpot jolo donggipa Paromgre aro Asakgre-o koela aro rong·mesak bikotenga ine chanchichipenggipa biapona re·anganio NGO-rangoni aro songni manderangoniba badi ka·a dongja ine District Administration-ni a·kanganiara kakket ong·ja, ian tol·gipa kattarangsa ong·a, maina ua somoio chinga an·tangtangba donga aro ua jolo niam gri a·ningni bosturangko bikotengani gimin raken jegalanirangko dakaha,” ine NGO-rang parakatskaha.

NGO-rangni parakatani gitade, Paromgre songo a·ningni bosturangko bikotgipa biapko nieani somoio, Chokpot C&RD block-ni BDO aro Pulis-rang baksa adita sak sorkari official-rangba dongpaaha, indiba ua somoio, ua manderangni bikotenggipa a·ningni bosturangara maimanchachim, uko ma·sina gita Scientific ba Geological Expert-rang dongja.

“Ua biapo chinga uamangni bikotgipa bosturangko nion, nikronggijagipa ro·ongrangko nikani gimin chanchichipanirang ong·kataha, indiba ua somoio u·ima·sigipa manderang dongjani a·sel ua bosturangko porikka ra·e nina man·jaha. Ua bosturangko porikka ra·e nianirang dongjani giminan, official-rango ka·dongchakna man·jaenga” ine NGO-rang parakataha.

Ua biapona re·ange, a·ningoniko bikotgimin bosturangko nikani ja·man, uamang bakan ua biapo cho·anirangko dontongatchina aro sandirokatchina gita Deputy Commissioner-na sedoataha ineba NGO-rang parakataha.

Uni gimin, “NGO-rangoniko aro manderangoniko maming badi ka·anirangko man·jaha, ine District Administration-ni agananiara kakket ong·ja aro manderangko dilsretengasa” ine NGO-rang matnangataha.

Ua biaprango GHADC-ni Permission gri, a·ningni bosturangko bikotengani gimin, NGO-rang, a·dok sorkariko matnangataha.
“Chokpot jolrangara, Indian Constitution-ni on·gimin, Sixth Schedule-ni a·jao ga·akgipa biaprangsa ong·a aro ua biaprango je kamrangko ka·na skangba GHADC-ni permission-ko ra·chengna nangachim.

District Council-ni permission gri skatang Sixth Schedule a·jao napdrae, a·ningni gamrangko bikotaniara a·songni dongimin niamko pe·ani ong·a aro Tribal manderangna on·gimin bilrangko ra·sekaniba ong·a” ine Chokpot jolni NGO-rang parakataha.